Հաշվի առնելով Հրազդանի ցեմենտի գործարանի ռազմավարական դերը՝ արդյո՞ք Կառավարությունը որևէ պլան ունի՝ փրկել ընկերությունը. ԱԺ-ում էկոնոմիկայի փոխնախարար Էդգար Զաքարյանից հետաքրքրվեց ՔՊ խմբակցության պատգամավոր Արսեն Թորոսյանը։
«Մեր վարած քաղաքականության պատճառով խնդիր ունենք «Հրազդան ցեմենտի» հետ։ Գիտեմ, որ կա սնանկացման գործընթաց, որը հերթականն է վերջին տասնամյակների ընթացքում»,- նշեց Թորոսյանը։
Փոխնախարարը տեղեկացրեց, որ գործընթացը Կառավարության ուշադրության կենտրոնում է.
«Մի քանի անգամ կոնսուլտացիաներ են եղել սեփականատերերի հետ, այս պահին մշակվում է ճանապարհային քարտեզ՝ ինչպես հարցը լուծել»,- նշեց Զաքարյանը։
Թորոսյանն առաջարկեց դիտարկել «Հրազդան ցեմենտի» առողջացման ծրագրում Կառավարության մասնաբաժնի տարբերակը՝ հաշվի առնելով Կառավարության քաղաքականությունը նմանատիպ մեծ ռազմավարական օբյեկտների հետ, այդ թվում՝ հանքարդյունաբերական։
