Հայաստանի ԳԽ և Արցախի ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է.
Ֆեյսբուքի եւ «պատասխանատու մամուլի» ինֆոմոջահեդները մի վարկած են գեներացնում, որ Ադրբեջանի հոգեւոր առաջնորդ Փաշազադեն մայիսի 22-ին Էջմիածինն անվանել է «Ուչմուաձին», Նիկոլ Փաշինյանն էլ նրա «հրահանգը կատարում է՝ հարձակվելով Հայ առաքելական եկեղեցու դեմ»:
Ադրբեջանում Էջմիածինն «Ուչքիլիսե» անվանում են վաղուց, երբ Հայաստանում ազգային, նժդեհա-դաշնակցական իշխանություն էր: Որպես վկայություն՝ թողնում եմ այս հղումը https://news.day.az/politics/858854.html : Ցանկացողները կարող են բացել եւ կարդալ Բաքվի պաշտոնական լրատվամիջոցի հրապարակումը: Բայց ամենակարեւորը դա չէ, այլ՝ պատմական իրողությունը: Իսկ այն վկայում է, որ Հայ առաքելական եկեղեցու հովվապետական աթոռը Բագրատունյաց թագավորության անկումից հետո տեղափոխվել է Կիլիկիա՝ Սիս, որտեղ մնացել է ավելի քան երեք դար: Իսկ երբ 1441 թվականին վերադարձել է, Հայաստանը գրավված էր կարակոյունլու թուրքերի կողմից, վերանվանված Չուխուր-Սաադի բեգլարբեգություն, իսկ Էջմիածինն՝ Ուչքիլիսե. թուրքերը, երեւի, այնտեղ երեք եկեղեցի էին տեսել:
Ի դեպ, այդ մասին վկայում է Ամենայն հայոց կաթողիկոս Սիմեոն Երեւանցին: ՀԱԵ Շիրակի թեմի առաջնորդ Միքայել արքեպիսկոպոս Աջապահյանը Հայաստանի քաղաքական վերնախավին եւ ժողովրդին հոգեւոր հարցերում «տգետ» է անվանում:
Եկեղեցու սպասավորները եւ նրանց քարոզիչները, ինչպես վկայում է Փաշազադեի «հրահանգի» առասպելը, մեղմ ասած, առանձնակի իմացությամբ չեն փայլում:
