Հայաստանի ԳԽ և Արցախի ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է.
Հայաստանում որոշ շրջանակներ, կարծես, «վիզ են դրել», որ Ալլահշյուքյուր Փաշազադեից Ադրբեջանում հերոսի կերպար կերտեն: Ինչպես «արդի երեւաներենով» են ասում՝ ժողովուրդ, դուք լու՞րջ եք: Բաքվում Փաշազադեին վաղուց ոչ ոք շան տեղ չի դնում:
Պատերազմից մոտ հինգ տարի է անցել, մեկնումեկդ տեսե՞լ եք, որ նա Ալիեւի հետ գոնե Շուշի ոտք դրած լինի: Չկա, չեք գտնի գեթ մի լուսանկար, տեսախրոնիկայի մի կադր: Էդ մարդուց նույնիսկ մզկիթի մոլլա նշանակելու իրավունք են խլել, մոլլային կառավարությունն է նշանակում, ռոճիկ վճարում: Շեյխի «ոսկեդարն» ավարտվել է, անցյալ տարվա Միլլի մեջլիսի ընտրություններին էլ եղբորն են դեպուտատական մանդատից զրկել:
Բաքվում էդ մարդուն գիտեն որպես ՊԱԿ-ի բարձրաստիճան սպայի, որ ժամանակին աֆղան մոջահեդների հետ բանակցում էր խորհրդային գերիներին վերադարձնելու հարցերով: Նրան Ադրբեջանի հերոս ներկայացնելով ի՞նչ եք ուզում անել, ժողովուրդ: Ալիեւի «կոշտուկն եք տրորու՞մ», թե՞՝ Էրդողանի, որ շեյխին դեմ է որպես շիադավանի, այսինքն՝ Ադրբեջանում իրանական ազդեցության ռեզիդենտի: Էդ «խաղի» վտանգավորության խորքը տեսնու՞մ եք, էդ «ջրապտույտի» մեջ որ մտնում եք, ենթադրաբար՝ արտաքին կենտրոնից ուղղորդմամբ, դրա «թափը» պատկերացնու՞մ եք:
Մարդը ղարաբաղյան երկրորդ պատերազմի «հաղթանակը» վերագրել է Իսլամական հեղափոխության առաջնորդ այաթոլլա Ալի Խամենեիի «ֆեթվայի» զորությանը: Վրիպել է կամ գիտակցաբար է արել՝ էական չէ, բայց Թուրքիայից կոպիտ պատասխան է ստացել, սսկվել: Դուք դրան կարեւորում եք որ ի՞նչ անի: Թե՞ հավատում եք, որ Ռուսաստանը Փաշազադեին հակաալիեւյան «հինգերորդ շարասյան» հրամանատա՞ր է նշանակելու:
