Ռուսաստանի Անվտանգության դաշնային ծառայությունը ձերբակալել է ՌԴ երկու քաղաքացու, որ փորձել են Մոսկվայի ռազմաարդյունաբերական ձեռնարկությունների մեկի տարածք ինքնաշեն պայթուցիկ սարքեր տեղափոխել: Այդ մասին պաշտոնական հաղորդագրություն է տարածել ԱԴԾ հանրային կապերի կենտրոնը: Հայտնում են, որ ձերբակալված անձանցից մեկը ծնվել է 1987, մյուսը՝ 1999 թվականին: Նրանք մտադիր էին ռազմաարդյունաբերական համալիրի ձեռնարկություններից մեկում «դիվերսիա իրականացնել»: Այդ նպատակն իրագործելու համար «չարամիտները թաքստոցից վերցրել են բաղադրիչներ եւ հավաքել ինքնաշեն պայթուցիկ սարք», բայց ձերբակալվել են «սարքը ձեռնարկության տարածք փոխադրելու փորձի ժամանակ»:
Ըստ ԱԴԾ տեղեկությունների, հիշյալ անձինք միմյանցից անկախ Telegram-ի միջոցով կապ են հաստատել ՌԴ Գերագույն դատարանի կողմից ծայրահեղական ճանաչված եւ Ռուսաստանի տարածքում արգելված ուկրաինական կազմակերպության հետ եւ նրա ցուցումով աշխատանքի են անցել ռազմաարդյունաբերական համալիրի ձեռնարկություններից մեկում, որտեղ կարեւորագույն օբյեկտները լուսանկարել եւ կադրերն ուղարկել են «իրենց կուրատորներին»: Ձերբակալված անձանց նկատմամբ քրեական գործ է հարուցվել, նախաքննություն է ընթանում:
ՌԴ ԱԴԾ-ի այս հաղորդագրությունն ուշագրավ է նրանով, որ հաջորդում է Ռուսաստանի տարածքում երկաթուղային գնացքակազմ գրոհելու եւ շուրջ հարյուր միավոր զինտեխնիկա ոչնչացնելու մասին ուկրաինական հատուկ ծառայությունների տարածած տեղեկատվությանը: Ընդ որում այդ փաստը հաստատել են ռուսաստանցի տասնյակ բլոգերներ, որ խստագույն քննադատության են ենթարկել ԱԴԾ-ին եւ մյուս պատկան մարմիններին՝ կատարվածը վերագրելով նրանց ոչ պրոֆեսիոնալ աշխատանքին: Ռուսաստանցի բլոգերներից մեկը զարմանք է հայտնել, թե ինչպե՞ս կարելի էր զրահատեխնիկա փոխադրող գնացքակազմը կանգնեցնել զորեն բարձած վագոններին մոտ: Նրա տեղեկացվածությամբ՝ ուկրաինական դրոններն ռազմական տեխնիկան գրոհել են՝ «հանկարծակի դուրս թռչելով ցորեն բարձած վագոններից»:
Արեւմտյան որոշ լրատվամիջոցներ ռազմական գնացքաշարի ոչնչացումն անվանել են ուկրաինական հատուկ ծառայությունների կողմից «Սարդոստայն-2» հատուկ գործողության իրականացում: Իրոք, եթե այդ տեղեկատվությունը համապատասխանում է իրականությանը, ապա Ռուսաստանը երկրորդ լուրջ հարվածն է ստացել: Իսկ դա վկայում է, որ ուկրաինական հատուկ ծառայություններն Ռուսաստանի ներսում ունեն ներդրված պրոֆեսոիոնալ գործակալներ:
Երկու դեռահասի կամ «ձախողված դիվերսանտի» ձերբակալությունն այս դեպքում խնդրի լուծում չէ: Ռուս-ուկրաինական պատերազմը վերածվում է տեխնոլոգիական եւ հատուկ ծառայությունների մրցակցության: Իսկ Ռուսաստանը, որքանով հասկացվում է, հակազդեցության բավարար միջոցներ չունի: Կամ էլ նախագահ Պուտինը պետք է հատուկ ծառայություններում «մեծ մաքրում» իրականացնի: Կգնա՞ նա նման քայլերի:
Թիվ 1 սյունակ, Վահրամ Աթանեսյան
