ՀՀ–ում քրեական վերաքննիչ բողոքները կքննվեն միայն գրավոր ընթացակարգով։ «Քրեական դատավարության» ՀՀ օրենսգրքում համապատասխան փոփոխություններ կատարելու մասին նախագիծն ընդունվեց ՀՀ կառավարության այսօրվա նիստի ժամանակ։ ՀՀ արդարադատության նախարար Սրբուհի Գալյանը նշեց, որ նախագծով սահմանվում է ընդհանուր կարգավորում, ըստ որի քրեական դատավարությունում վերաքննիչ բողոքները որպես կանոն, կքննվեն գրավոր ընթացակարգով։
«Կլինեն, իհարկե, բացառություններ, երբ անհրաժեշտ կլինի բանավոր ընթացակարգ կիրառել, սակայն դատարանը յուրաքանչյուր դեպքում պետք է պատճառաբանի, թե ինչու է շեղվել ընդհանուր կանոնից։ Սա կհանգեցնի դատարանի ծանրաբեռնվածության թեթևացման և բողոքների ավելի արդյունավետ քննության»,– նշեց նախարարը։
Գալյանի խոսքով քրեական վերաքննիչ քննությունը պետք է տևի 6 ամիս, որը դատարանի պատճառաբանված որոշմամբ կարող է երկարաձգվել միայն մեկ անգամ 4 ամիս ժամկետով։
Ըստ նրա եթե գործերի քննությունը 10 ամսից ավել տևի, իսկ պրակտիկայում նման դեպքերը հնարավոր չէ բացառել, ապա դա դատավարության կողմերի համար նշանակություն չի ունենա, միևնույնն էգործը կընթանա, ու դատարանը որոշում կկայացնի, սակայն դատավորի համար դա միանշանակ նշանակություն կունենա կարգապահական պատասխանատվության տեսքով։
Այս պահին քննարկում չկա․ Գալյանը՝ Սահմանադրության մեջ եկեղեցուն առնչվող փոփոխության մասին
