Հայաստանի ԳԽ և Արցախի ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է.
ԱՄՆ նախագահ Դոնալդ Թրամփը Սպիտակ տանը լրագրողներին ասել է, որ նախօրեին հեռախոսազրույց է ունեցել Վլադիմիր Պուտինի հետ:
«Ես նրան խորհուրդ եմ տվել նախ զբաղվել Ռուսաստանով, դադարեցնել պատերազմը, ապա նոր մտածել Մերձավոր Արեւելքում միջնորդության մասին»,- ասել է Թրամփը:
Այն, որ միջազգային իրավունքի հիմնարար սկզբունքները, ՄԱԿ-ի Խարտիան կոպտորեն ոտնահարող երկրի նախագահը չի կարող այլ հակամարտության կողմերին միջնորդություն առաջարկել, ակնարկել էր նաեւ Իսրայելի վարչապետ Նաթանյահուն: Բայց որ Թրամփն այդքան կոպիտ եւ ցինիկորեն Պուտինի «վրայից կանցնի»՝ վեր է նույնիսկ երեւակայությունից:
Երբ ասում էինք, որ ուկրաինական պատերազմն Ռուսաստանի, նրա ժողովրդի համար ծուղակ է, թակարդ է, հայրենական պուտինապաշտները մեզ «ժողովրդի թշնամի» էին ներկայացնում: Հիմա Ռուսաստանն այն վիճակում է, որ Անվտանգության խորհրդի քարտուղարը Հյուսիսային Կորեայի առաջնորդի «ոտքն է գնում», իսկ ԱԳ նախարարի վիզավին Ջեյհուն Բայրամովն է: Սա չի նշանակում Ռուսաստանի վրա չարախնդալ:
Ընդամենը փաստերի արձանագրում է, որ Հայաստանի իշխանություններին եռակի-քառակի աչալրջության եւ սառը հաշվենկատության պիտի մղի, հանրությանը՝ գիտակցված ողջախոհության:
