Հայաստանի և Ադրբեջանի միջև խաղաղությունն արդեն գոյություն ունի։ Եթե նայեք մեր սահմաններին, կտեսնեք խաղաղություն և կայունություն։ Այս մասին հայտարարել է Ադրբեջանի նախագահի խորհրդական Հիքմեթ Հաջիևը։
«Հայաստանի և Ադրբեջանի միջև խաղաղությունն արդեն գոյություն ունի։ Եթե նայեք մեր սահմաններին, կտեսնեք խաղաղություն և կայունություն։ Հայաստանի հետ ունենք երկկողմ կապ։ Խնդրահարույց հարցերը քննարկում ենք ուղիղ, առանց միջնորդի։ Հաջողվել է մեր հարաբերությունները ռազմական բախումից տեղափոխել քաղաքական վեճի դաշտ»,- ասել է նա։
Ըստ Հաջիևի՝ տարածաշրջանում ստեղծվել է նոր ստատուս քվո ՝ հիմնված օրինականության և լեգիտիմության վրա։
«Կարելի է խաղաղություն ունենալ թղթի վրա, բայց տեղում իրավիճակը կարող է այլ լինել։ Հիմա մեզ մոտ հակառակ իրավիճակն է։ Տեղում խաղաղություն կա, հայ-ադրբեջանական սահմանը կայուն է, Ղարաբաղն այլևս քննարկման առարկա չէ։ Հայկական ուժերն ամբողջությամբ դուրս են բերվել ադրբեջանական բոլոր տարածքներից։ Բայց որպեսզի խաղաղության համաձայնագիրը վերջնականապես ուժի մեջ մտնի, անհրաժեշտ է ևս մեկ վերջին քայլ»,- հավելել է նա։
Ադրբեջանը ակնկալում է, որ Հայաստանը փոփոխություններ կմտցնի Սահմանադրության մեջ, որը մինչ օրս իբր պարունակում է դրույթներ Ադրբեջանի նկատմամբ տարածքային պահանջների վերաբերյալ:
«Այնուամենայնիվ, դրական է այն, որ մենք Հայաստանի հետ ունենք երկկողմանի կապի ուղի։ Մենք խնդրահարույց հարցերը քննարկում ենք ուղղիղ, առանց որևէ միջնորդի։ Եվ մեր օրակարգում իսկապես կարևոր թեմաներ կան։ Առանցքային կետը մնում է այն, որ ռազմական առճակատման տարրերը լիովին դուրս են մնացել մեր օրակարգից։ Այո, մեր միջև վեճ է մնում, բայց հարևան երկրների միջև վեճերը նորմալ են։ Մենք դրանք տեսնում ենք նույնիսկ ԵՄ որոշ անդամների միջև։ Բայց վեճերը լուծելու համար գոյություն ունեն դիվանագիտություն և երկխոսություն։ Մեզ հաջողվել է Հայաստանի հետ մեր հարաբերությունները ռազմական առճակատումից տեղափոխել քաղաքական վեճի դաշտ։ Եվ ես կարծում եմ, որ դա լավ նշան է»,- ընդգծել է Հաջիևը։
