Ադրբեջանի նախագահ Իլհամ Ալիևը ցավակցական նամակ է հղել Թուրքիայի նախագահ Ռեջեփ Թայիփ Էրդողանին՝ Թուրքիայում հուլիսի 15-ի հեղաշրջման փորձի իններորդ տարելիցի կապակցությամբ։
«Այդ գիշեր եղբայրական Թուրքիան գրեց իր ժամանակակից պատմության մեծագույն հերոսական տարեգրությունը։ Վճռականորեն դեմ լինելով Թուրքիայի Հանրապետության սահմանադրական և ժողովրդավարական հիմքերի դեմ ուղղված արյունալի հեղաշրջման փորձին՝ ձեր անսասան և մարտնչող ժողովուրդը պաշտպանեց իր հայրենիքը, դրոշը և պետությունը։ Այսօր մենք կարող ենք հպարտությամբ ասել, որ հուլիսի 15-ը՝ Ժողովրդավարության և ազգային միասնության օրը, նշանակալի ամսաթիվ է, որը ընդգծում է ուժեղ և անսասան կամքի, ազգային միասնության, համերաշխության և հայրենասիրության հաղթանակը»,– նշել է Ալիևը։
Ադրբեջանի նախագահի խոսքով՝ Քրդական բանվորական կուսակցություն (ՔԲԿ) ահաբեկչական խմբավորման վերջերս լուծարման և զենքերը վայր դնելու որոշումը Էրդողանի ուժեղ քաղաքական կամքի փայլուն արդյունքն էր, ազգային միասնության և համերաշխության հաղթանակը։
«Այսօր Ադրբեջանն ու Թուրքիան, ուս ուսի տված, վստահորեն և հաջողությամբ շարժվում են դեպի ապագա։ Մեր երկրների անսասան եղբայրությունը, եզակի միասնությունն ու ռազմավարական դաշինքը անվտանգության, գործընկերության և զարգացման կարևոր գործոն են ինչպես մեր տարածաշրջանի, այնպես էլ ամբողջ աշխարհի համար։ Վստահ եմ, որ մեր ռազմավարական դաշինքը, որը հիմնված է պատմականորեն միմյանց աջակցած երկու եղբայրական ժողովուրդների կամքի, ինչպես նաև Շուշիի հռչակագրի վրա, կշարունակի ամրապնդվել և խորանալ համատեղ ջանքերով»,– ասված է ուղերձում։
