Հայկական կոնյակի ճնշող մեծամասնությունը (85%), որոնք մատակարարվում են ռուսական շուկա, չեն համապատասխանում գործող չափանիշներին և կեղծ են:
Դա է ցույց տվել Կոնյակ, սպիրտ և ալկոհոլային արտադրանք արտադրողների միության (СоюзКоньяк) համատեղ հետազոտությունը «Անտիկոնտրաֆակտ» միջազգային ասոցիացիայի հետ, որի արդյունքները ներկայացրել է «Газета.Ru»-ն:
Հաղորդվում է, որ ուսումնասիրությունը անցկացվել է Գարեջրագործության, զովացուցիչ ըմպելիքների և գինու արդյունաբերության հետազոտական ինստիտուտում։ Ընդհանուր առմամբ, մասնագետները ուսումնասիրել են դաշնային մանրածախ առևտրի ցանցերից գնված հայկական կոնյակի 71 նմուշ։ Նմուշում ներառված են եղել ութ խոշորագույն հայկական արտադրողների՝ այդ թվում՝ Աբովյանի, Արարատի և Պռոշյանի կոնյակի գործարանների խմիչքներ։
Նմուշների կեսը (71-ից 35-ը) պարունակել է ոչ խաղողի սպիրտ։ Սա հաստատվել է ածխածնի, ջրածնի և թթվածնի իզոտոպների հարաբերակցության վերլուծությամբ. այդ արդյունքները ցույց են տվել, որ հումքը չի համապատասխանում ռուսական ԳՕՍՏ-երին, և դրանցից պատրաստված արտադրանքը չի կարող համարվել կոնյակ։
Մասնագետների կարծիքով, խնդրահարույց ապրանքների հիմնական հոսքը տարանցիկ անցնում է Վրաստանով՝ սա Հայաստանից Ռուսաստան մատակարարումների հիմնական ցամաքային ուղին է։ Ըստ «Անտիկոնտրաֆակտի»՝ կեղծ և ցածրորակ ապրանքների մինչև 60%-ը անցնում է դրանով. ոչ միայն ալկոհոլը, այլև՝ հագուստը, կոշիկը և սննդային հավելումները։
Հատկանշական է, որ նյութում նշվում է, որ միավորումն արդեն սկսել է համագործակցել վրաց-ռուսական գործարար ասոցիացիայի հետ՝ այս ոլորտում մաքսային վերահսկողությունը ուժեղացնելու և կեղծ ապրանքների հոսքը կանխելու համար։
