Հայաստանի ԳԽ և Արցախի ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է.
Տեղի է ունենում պատմա-քաղաքական նենգափոխում: ՀՀԿ Գործադիր մարմնի անդամ, Ազգային ժողովի նախկին երկարամյա պատգամավոր Գագիկ Մինասյանը Լեռնային Ղարաբաղի կարգավորման հարցում Հայաստանի նախկին երեք նախագահների արտաքին քաղաքականությունը նույնականացրել է:
Եթե ՀԱԿ-ը հանգամանքների, գաղափարական տարաձայնությունների կամ անձնական անհանդուրժողականության բերումով այսօր վարչապետ Նիկոլ Փաշինյանի ամենաեռանդուն եւ նույնիսկ մոլեռանդ քննադատն է, ապա չի հետեւում, թե առաջին նախագահ Լեւոն Տեր-Պետրոսյանը ԼՂ կարգավորման նույն հայեցակարգն է ունեցել, ինչ՝ նրա հաջորդներ Ռոբերտ Քոչարյանը եւ Սերժ Սարգսյանը: Այլապես ինչու՞ 1998 թվականին իշխանափոխություն է տեղի ունեցել, որի խորքային պատճառների մասին Լեւոն Տեր-Պետրոսյանը հրաժարականի խոսքում զգուշացրել է, թե ապագան ցույց կտա՝ ով է իրականում «հանձնում Ղարաբաղը»:
Իսկ եթե ՀԱԿ-ն ընդունում է ՀՀԿ նարատիվը, ապա Հայաստանի տասնյակ հազարավոր քաղաքացիներ, որ 2007-08 թվականներին անկեղծորեն հավատացել են առաջին նախագահին, կանգնել նրա կողքին, ենթարկվել բռնությունների, բանտ նստել, հալածվել, իրավունք ունեն հայտնի գրական հերոսի հանգույն հարցնել. «Հըբը կյանքս ընչի՞ անցավ»: Եւ, գուցե, Նիկոլ Փաշինյանն առաջի՞նն է դա հասկացել:
