Հուլիսի 22-ին շարունակվել է Բաքվում ապօրինի պահվող Արցախի նախկին պետնախարար Ռուբեն Վարդանյանի գործի քննությունը՝ նախագահությամբ Բաքվի ռազմական դատարանի դատավոր Զեյնալ Աղաևի։
Դատավարությանը ներկա են լինում միայն ադրբեջանական պետական և իշխանությունների կողմից վերահսկվող լրատվամիջոցները։ Հնարավոր չէ այլ աղբյուրներից ճշտել դատվող հայերին վերագրվող հայտարարություններն ու դատավարության այլ մանրամասները։
«Հետք»-ի փոխանցմամբ, նիստի ժամանակ Ռուբեն Վարդանյանն առարկություն է ներկայացրել՝ պնդելով, որ նախաքննության ընթացքում ներգրավված թարգմանիչները ոչ պրոֆեսիոնալ և կողմնակալ են եղել։ Նրա պաշտպան Աբրահամ Բերմանը պաշտպանել է Վարդանյանի այս պնդումը՝ թվարկելով թարգմանիչների անունները։
Գլխավոր դատախազի ավագ օգնական Վուսալ Ալիևը հակադարձել է՝ նշելով, թե «Վարդանյանը չի նշել ոչ պրոֆեսիոնալիզմի դեպք և չի ներկայացրել կողմնակալության ապացույցներ», նա դատարանին խնդրել է մերժել առարկությունը։ Դատավոր Աղաևը հայտնել է, որ Վարդանյանը չի ներկայացրել ապացույցներ իր պնդումները հիմնավորելու համար և մերժել է առարկությունը։
Այնուհետև Ռուբեն Վարդանյանը առարկել է փետրվարի 25-ի դատական նիստի արձանագրություններում ներկայացված մանրամասների վերաբերյալ՝ մատնանշելով ընթացակարգային խախտումներ և դատական կողմնակալությունը։ Նրա պաշտպանը միացել է այս առարկությանը։
Դատավոր Աղաևը նշել է, որ առարկությունները պետք է գրավոր հիմնավորվեն Ադրբեջանի քրեական դատավարության օրենսգրքի համաձայն, և ըստ դատավորի՝ «կողմնակալության որևէ հավաստի ապացույց չի ներկայացվել», ինչի համար առարկությունը մերժվել է։
Այնուհետև գործով «տուժողները» և նրանց օրինական ներկայացուցիչները ցուցմունքներ են տվել։ Մենք չենք ներկայացնում այդ ցուցմունքները, քանի որ այդ մտացածին պատմություններում Հայաստանը ներկայացված է որպես ագրեսոր և նրանք իբրև թե վիրավորումները ստացել են «սադրանքները» կանխելու ժամանակ։ Դատարանը ներկայացրել է նաև «տուժողների» վերաբերյալ դատաբժշկական փորձաքննության եզրակացությունները։ Հաջորդ դատական նիստը նշանակվել է հուլիսի 29-ին։
