Զանգեզուրի միջանցքի նախագիծը ուղղակի սպառնալիք է Իրանի ազգային անվտանգությանը և տարածաշրջանային կապերին։ Այդ մասին հայտարարել է Իրանի գերագույն առաջնորդի միջազգային հարցերով ավագ խորհրդական Ալի Աքբար Վելայաթին, գրում է իրանական Tasnim լրատվական գործակալությունը։
«Առաջարկվող Զանգեզուրի միջանցքը ԱՄՆ-ի և Իսրայելի ռեժիմի կողմից ղեկավարվող աշխարհաքաղաքական ծրագիր է՝ Իրանի ազգային անվտանգությունն ու ռազմավարական կապերը խաթարելու համար։ Այն նպատակ ունի խզել Իրանի ցամաքային կապերը Կովկասի հետ և ցամաքային շրջափակում սահմանել ինչպես Իրանի, այնպես էլ Ռուսաստանի վրա հարավից»։
Նա նշել է, որ ԱՄՆ-ն և Իսրայելը ձգտում են թուլացնել իրանական ինքնության հիմքերը։ Վելայաթին ասել է, որ Զանգեզուրի միջանցքի նման ծրագրերը ծառայում են որպես քողարկում ավելի մեծ աշխարհաքաղաքական նախագծերի համար։
«Այս նախագիծը միայն տարածաշրջանային տրանսպորտի մասին չէ. այն Ամերիկայի աշխարհաքաղաքական ճնշման շարունակությունն է», – ասել է նա՝ նշելով, որ Իրանի ազգային անվտանգությունը մնում է կարմիր գիծ։
