2025թ. հուլիսի 27-ին Բերդի ոստիկանության բաժանմունքում գրանցվել է հաղորդում այն մասին, որ գիշերային ժամերին՝ 01:00-ից մինչև առավոտյան 09:00-ն ընկած ժամանակահատվածում, Բերդի քննչական բաժնի պետ Հունան Գարանյանը հեռախոսազանգերի և այլ միջոցներով շարունակաբար փորձել է կապ հաստատել tiv1.am լրատվական կայքի հիմնադիր Էդգար Բաբայանի հետ։
Ըստ հաղորդման՝ պատճառը Բաբայանի՝ Ֆեյսբուք սոցիալական ցանցում արված գնահատողական կարծիքն է՝ վերաբերվող Բերդում վերջերս անցկացված մշակութային միջոցառմանը և դրա կազմակերպիչներին։
Էդգար Բաբայանը, ով միաժամանակ հանդիսանում է Հայաստանի ռեստորանատերերի և հյուրանոցատերերի ասոցիացիայի նախագահ, ինչպես նաև Բերդ համայնքում ներդրումային ծրագրեր իրականացնող գործարար, հայտարարել է, որ զանգերի ընթացքում իրեն ուղղվել են փողոցային և սպառնալիքներով հագեցած խոսքեր, ներառյալ՝ կյանքի և առողջության դեմ ուղղված սեռական բնույթի արտահայտություններ։
Ի պատասխան կատարվածի, Բաբայանը ահազանգել է ոստիկանություն՝ 1-02 թեժ գծով։ Ոստիկանության հաղորդմամբ, Բերդի ոստիկանապետի հանձնարարությամբ դեպքին տրվել է արագ արձագանք և քաղաքացուց ընդունվել է գրավոր հաղորդում։
Համայնքում ներդրումային գործունեությամբ զբաղվող անձի հանդեպ հնարավոր ճնշումները, ըստ որոշ աղբյուրների, կապված են տեղական իշխանությունների շրջանում ստեղծված անհանգստության հետ՝ կապված տարածաշրջանային զարգացումներին ու քաղաքացիական ներգրավվածությանը։
Հատկանշական է նշել, որ փողոցային այս պահվածքի հեղինակն է Բերդում հայտնի Մանուչարյանների ընտանիքի փեսան որը համատեղության կարգով նաեւ Բերդ համայնքի քննչականի պետն է։ Զուգադիպությու՞ն։
Համայնքում Էլեկտրոցանցից մինչեւ իրավապահ համակարգ մետաստազներով տեղավորված այս կլանը չի հանդուրժել եւ շարունակում է չհանդուրժել այլակարծություն։
Հիշեցնենք, որ Բերդում հայտնի նախկին քաղաքապետ Մանուչարյանը, մերձավոր շրջապատը եւ բարեկամները անցնում են տարբեր քրեական գործերով։
Միջադեպի վերաբերյալ Բերդի քննչական ծառայության կողմից առայժմ պաշտոնական մեկնաբանություն չի ներկայացվել։ Դեպքի մանրամասները ուսումնասիրվում են իրավապահների կողմից։
