Մինչև 42 աստիճան շոգ կլինի օգոստոսին, սակավաջուր ամիս է սպասվում․ Սուրենյան

Օգոստոսի երկրորդ տասնօրյակում, երբ ունենանք սառը օդային հոսանքների ներթափանցում, գիշերային ժամերին նվազագույն ջերմաստիճանը կիջնի։ Այս մասին մամուլի ասուլիսում հայտնեց «Հիդրոօդերևութաբանության և մոնիթորինգի կենտրոն»-ի տնօրենի տեղակալ Գագիկ Սուրենյանը։

«Մինչև օգոստոսի 9–ը ներառյալ Հայաստանը շարունակելու է գտնվել արևադարձային տաք օդային ալիքի ազդեցության տակ, այսինքն՝ մինչև օգոստոսի 9–ը ջերմասիճանի որևէ փոփոխություն չունենք։ Ամենաբարձր ջերմաստիճանները կգրանցվեն Արարատյան դատում, Սյունիքի հովտային գոտում և Երևանում՝ ցերեկային ժամերին հասնելով մինչև 39–41 աստիճան»,– ասաց նա՝ չբացառելով, որ առանձին հատվածներում օդի ջերմաստիճանը կհասնի 42 աստիճանի։

Սուրենյանը նշեց, որ օգոստոսի 10–11 ընկած ժամանակահատվածում հանրապետությունում օդի ջերմաստիճանը կարող է նվազել 3–4 աստիճանով։

«Լուրջ ջերմաստիճանի անկում, որը կարող է զովություն բերել՝ առաջիկա 10 օրերին չի կանխատեսվում, որովհետև +36…+37 աստիճանը նույնպես համարվում է բարձր ջերմաստիճան», – ասաց Սուրենյանը: