Իրանի անվտանգության բարձրագույն մարմինը հաստատել է նոր պաշտպանության խորհրդի ստեղծումը։ Այս մասին կիրակի օրը հաղորդել են պետական լրատվամիջոցները՝ Իսրայելի հետ 12-օրյա պատերազմին վերջ դրած հրադադարից մեկ ամիս անց, գրում է Asharq al-awsat-ը։
«Ազգային անվտանգության գերագույն խորհուրդը հաստատել է Ազգային պաշտպանության խորհրդի ստեղծումը»,- հայտնել է պետական հեռուստատեսությունը։ Նոր մարմնին, որը կղեկավարի նախագահը և կներառի բարձրաստիճան զինվորական հրամանատարների, այլ բարձրաստիճան պաշտոնյաների ու նախարարների, կհանձնարարվի «վերանայել պաշտպանական ռազմավարությունները» և «բարձրացնել Իրանի զինված ուժերի կարողությունները»։
Ուրբաթ իրանական Fars գործակալությունը հայտնել էր, որ որոշումը կայացվել է Իրանի անվտանգության համակարգում իրականացվող ավելի լայն կառուցվածքային փոփոխությունների շրջանակներում։
Այս քայլը տեղի է ունենում Իսրայելի հետ հակամարտությունից հետո, որի հետևանքով, ըստ պաշտոնական տվյալների, Իրանում զոհվել է ավելի քան 1000 մարդ, իսկ Իսրայելում՝ 29։
Պատերազմը սկսվել էր հունիսի 13-ին, երբ Իսրայելը հարվածներ էր հասցրել Իրանի ռազմական, միջուկային և բնակելի օբյեկտներին։ Իրանը պատասխանել էր Իսրայելի տարածքի վրա պատասխան հարձակումներով։
Միացյալ Նահանգների կողմից հայտարարված հրադադարը ուժի մեջ է հունիսի 24-ից։ Իրանի զինված ուժերի գլխավոր հրամանատար Ամիր Հաթամին զգուշացրել է, որ Իսրայելից եկող սպառնալիքները շարունակվում են և չպետք է թերագնահատվեն։
