Հայաստանի ԳԽ և ԼՂ ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է․
Ես պնդում եմ, որ Երկիր մոլորակի վրա «ադրբեջանական հող» առհասարակ գոյություն չունի: Ներկայիս Ադրբեջանի տարածքում կան Վանի, Արտաշիսյան, Արշակունի, Հայաղվանքի, Բագրատունյաց թագավորության, Խաչենի իշխանապետության, Խամսայի մելիքությունների հողեր, որ Իլհամ Ալիեւը պարտավոր է վերադարձնել օրինական տիրոջը՝ հայ ժողովրդին, նույնը պարտավոր է անել Թուրքիան, որպեսզի Միջերկրականից մինչեւ Կասպից ծով հռչակվի ազատ, անկախ եւ միացեալ Հայաստան: Հետո՞, դրանից ի՞նչ է փոխվում:
Երեսունհինգ տարի առաջ ՀԽՍՀ-ը վերանվել է Հայաստանի Հանրապետություն, կրճատ՝ Հայաստան, եւ նրա սահմաններն այն են, ինչ ունեցել է ԽՍՀՄ կազմում: Վերջ, աշխարհը Հայաստանը ճանաչել եւ ճանաչում է այն տարածքում, որ ունեցել է ՀԽՍՀ-ն: Աշխարհն Ադրբեջանը ճանաչել եւ ճանաչում է որպես Ադր. ԽՍՀ-ի իրավահաջորդ:
Չէր ճանաչում Իլհամ Ալիեւը, երեկ Հայաստանի վարչաեպետի եւ ԱՄՆ նախագահի հետ ստորագրած հռչակագրով ճանաչեց: Եւ պետք է աշխատել, որ այդ հռչակագրային ճանաչումը վերջնական եւ անշրջելի իրավական ձեւակերպում ստանա: Թե չէ ֆեյսբուքյան սանձակոտոր դաշտում ամեն ոք կարող է Տիգրան Մեծ խաղալ:
