Երևանն ու Բաքուն բանակցությունների օրակարգից հանել են Զանգեզուրի միջանցքի ստեղծման հարցը, որը կլինի Ադրբեջանի իրավասության ներքո։ Այս մասին հայտարարել է Իրանի արտաքին գործերի նախարար Աբբաս Արաղչին՝ պարզաբանելով, որ այժմ խոսքը գնում է տարանցիկ ճանապարհի մասին է, որը չի խախտում Հայաստանի ինքնիշխանությունը։
«Տրանսպորտային միջանցք ստեղծելու գաղափարն ամբողջությամբ կորցրել է իր իմաստը։ Հիմա խոսքը տարանցիկ մայրուղի ստեղծելու մասին է, որը կլինի Հայաստանի իրավասության ներքո և հայ-ամերիկյան համատեղ ընկերության կառավարման ներքո, որը նույնպես գրանցված է Հայաստանում»,-ասել է նա։
Արաղչիի խոսքով՝ Թեհրանը խորհրդակցություններ է անցկացնում Երևանի հետ հայ-ադրբեջանական հակամարտության կարգավորման պարամետրերի վերաբերյալ, մասնավորապես՝ նախատեսվում է հեռախոսազրույց ՀՀ վարչապետ Նիկոլ Փաշինյանի հետ և ՀՀ փոխարտգործնախարարի այց։ Արաղչին չի նշել Թեհրան մեկնող հայ դիվանագետի անունը։
«Մենք դեռևս ունենք մեր մտահոգությունները, քանի որ Հարավային Կովկասում ցանկացած օտարերկրյա ներկայություն կարող է բացասական հետևանքներ ունենալ տարածաշրջանի խաղաղության և կայունության համար, ինչը մենք բազմիցս հիշեցրել ենք երկու երկրներին»,- հավելել է նա։
