«Այն, ինչ տեղի է ունենում Հարավային Կովկասում, շատ մեծ խնդիր է»․ Սոլովյովը սպառնացել է Ադրբեջանին

Ռուսաստանցի հայտնի հեռուստահաղորդավար Վլադիմիր Սոլովյովը «Ռոսիա 1» հեռուստաալիքի իր հաղորդման եթերում ակնարկել է, որ Ուկրաինայում հատուկ ռազմական գործողությունը կարող է վերջինը չլինել Ռուսաստանի համար առաջիկա տարիներին։

Նրա խոսքով՝ սպառնալիքը գալիս է Կասպից ծովում ՆԱՏՕ-ի բազաների հնարավոր հայտնվելուց, ինչպես նաև Ադրբեջանից, որի հետ Ռուսաստանը վերջերս լարված հարաբերություններ ունի։

«Այն, ինչ տեղի է ունենում Հարավային Կովկասում, շատ մեծ խնդիր է։ Կասպից ծովը կարող է հայտնվել այնպիսի դիրքում, որ այնտեղ կարող են հայտնվել ՆԱՏՕ-ի բազաներ։ Սա այնքան վտանգավոր է, որ, եթե դիտարկենք այն աշխարհաքաղաքական տեսանկյունից, ներկայիս հատուկ գործողությունը կարող է վերջինը չլինել մեր սերնդի համար», – ասել է Սոլովյովը։

Հեռուստահաղորդավարը հատուկ ուշադրություն է դարձրել Ռուսաստանում բնակվող սփյուռքի թեմային։ Նա բացահայտորեն մեղադրել է ռուսական անձնագրեր ունեցող ադրբեջանական սփյուռքի ներկայացուցիչներին ի շահ Ադրբեջանի, այլ ոչ թե Ռուսաստանի աշխատելու մեջ։ Հաղորդավարը կոչ է արել իրավապահ մարմիններին ուսումնասիրել այս հարցը։