Արցախի ԱԺ նախկին պատգամավոր, քաղաքական վերլուծաբան Վահրամ Աթանեսյանը «Ֆեյսբուքի» իր էջում գրել է.
Ո՞վ է ասում, թե Դուգինը Պուտինի «ուղեղն է»: Դուգինը Պուտինի խոսափողն է: Ռուս-թուրքական կոնֆեդերատիվ պետության ծրագիրը մշակվել է ՊԱԿ-ի կողմից: Որպես առաջին քայլ Հեյդար Ալիեւը նշանակվել է ԽՍՀՄ առաջին փոխվարչապետ:
Ծրագիրը տապալել է Գորբաչովի «պերեստրոյկան»՝ ԽՍՀՄ դաշնակից ընդունելով Արեւմուտքին: Երկրորդ փորձն արվել է 1991 թվականի օգոստոսին, երբ ՊԱԿ-ը պահանջել է ԽՍՀՄ վարչապետ նշանակել Նազարբաեւին: Այս անգամ խանգարել է Ելցինը, իսկ չորս ամիս անց սլավոնական երեք պետությունների առաջնորդները՝ Ելցինը, Կրավչուկը եւ Շուշկեւիչը Բելովեժյան թավուտում գրել են ԽՍՀՄ դամբանականը:
Պուտինը ՊԱԿ-ի պրոյեկտ է, բայց այս դեպքում ռուս-թուրքական կոնֆեդերացիան չի ստացվում հենց իր մեղքով. նա հարձակվել է սլավոնական ինքնության սրբության սրբոցի՝ Կիեւի վրա, դավաճանել է ուղղափառ Վրաստանին եւ քրիստոնեության օրրան Հայաստանին: Նման նենգադավ «մոր ծիծ կտրողի» ոչ մի թուրք չի վստահի:
Հ.Գ. Ղարաբաղյան շարժման բուն իմաստը Հայաստանը ռուս-թուրքական կոնֆեդերացիայից դուրս բերելն էր: Ելցինը ՊԱԿ-ի այդ «Լենին-Աթաթուրք» ծրագրին դեմ էր, մենք հաջողություն ունեցանք, որովհետեւ Ելցինը նաեւ Արեւմուտքի հետ հաշտության կողմնակից էր: Պուտինը ՊԱԿ-ի, Յուրի Անդրոպովի տրոցկիստական իդեա-ֆիքսի կրողն է, Ոսկե հորդայի ապոլոգետ, դրա համար էլ կորուստներ ունեցանք: Լինել պուտինական, նշանակում է լինել Ոսկե հորդայի գաղափարախոս: Вот и весь, вот и весь разговор:
