«Ինձ մեղադրանք են առաջադրում, որը ես չեմ ընդունում, այն իրականության հետ աղերս չունի»,-ասաց Հայաստանի նախկին վարչապետ Հովիկ Աբրահամյանը։
Լրագրողները նրան հարցրեցին, ինչո՞ւ են այս իշխանությունները յոթ տարի անց հիշել այդ քրեական գործի մասին, արդոյք ճի՞շտ են այն խոսակցությունները, որ գործի վերաբացման պատճառը Աբրահամյանի՝ ՌԴ ԱԳ նախարար Սերգեյ Լավրովի հետ հանդիպումն է։
Ի պատասխան կառավարության նախկին ղեկավարն ասաց՝ Սերգեյ Լավրովի հետ հանդիպում չի եղել, թե ինչո՞ւ են հիշել գործի մասին, պետք է հարցնել իշխանություններին։
Հովիկ Աբրահամյանի դեմ հարուցված քրեական գործի շրջանակաում հակակոռուպցիոն դատարանում առաջին նիստն է այսօր նշանակված։ Գործը քննելու է դատավոր Վահե Դոլմազյանը:
Հովիկ Աբրահամյանի նկատմամբ հանրային քրեական հետապնդում է հարուցվել պաշտոնեական դիրքի չարաշահման եւ ենթադրյալ հանցավոր ծագում ունեցող գույքի՝ հողամասերի օրինականացման մեղադրանքներով։
Նախկին պաշտոնյան հունիսի 13-ին ձերբակալվեց, հաջորդ օրը նրա նկատմամբ խափանման միջոց կիրառվեց․ դատարանի որոշմամբ նրան տնային կալանք սահմանվեց, իսկ հուլիսի վերջին արդեն, դատարանի որոշմամբ, տնային կալանքը փոխվեց վարչական հսկողության։
