Ռուսական պատվիրակությունը ժամանել է Ալյասկա և արտգործնախարար Սերգեյ Լավրովի գլխավորությամբ՝ արդեն մեկնել է Անքորիջ: Լավրովի խոսքով՝ ռուսական կողմը կներկայացնի իր հստակ դիրքորոշումը և հույս ունի, որ զրույցն օգտակար կլինի: Ռուսական պատվիրակության անդամ, ֆինանսների նախարար Անտոն Սիլուանովն էլ հայտարարել է, որ չնայած օրակարգում հիմնականում քաղաքական հարցեր են, կքննարկվի նաև տնտեսությունը։ Իսկ Վլադիմիր Պուտինը նախքան Ալյասկա ուղևորվելն այցելել է Մագադան:
Կրեմլի ղեկավարի հետ հանդիպմանն է անդրադարձել Դոնալդ Թրամփը: Նա հույս է հայտնել, որ այն կառուցողական կլինի: «Սակայն ավելի կարևոր է երկրորդ հանդիպումը՝ արդեն նախագահ Զելենսկու մասնակցությամբ: Հնարավոր է նաև եվրոպացի որոշ առաջնորդների մասնակցությունը, իսկ գուցե՝ ոչ: Կարծում եմ՝ Ռուսաստանի և Ուկրաինայի նախագահները խաղաղության կհասնեն: Տեսնենք՝ կկարողանա՞նք արդյոք», – նշել է Սպիտակ տան ղեկավարը: Նրա խոսքով՝ եթե Ալյասկայում հանդիպումը վատ սկսվի, այն կավարտվի շատ շուտ: Թրամփը նաև հայտարարել է, որ կարող է մտածել Եվրոպայում ամերիկյան ուժերի կրճատման մասին՝ Ուկրաինայում կարգավորմանը նպաստելու համար:
ԱՄՆ պետքարտուղարն էլ հայտնել է, որ Ալյասկայում քննարկելու են մարտական գործողությունները դադարեցնելու հնարավորությունը, սակայն հակամարտության լիարժեք կարգավորման համար ավելի շատ ժամանակ կպահանջվի: Մարկո Ռուբիոյի խոսքով՝ խաղաղության հասնելու համար անհրաժեշտ է քննարկել անվտանգության երաշխիքների և տարածքների հարցը:
Ալյասկայում նախատեսված Թրամփ-Պուտին բանակցություններին ընդառաջ գիշերն Անքորիջում ցույցեր են անցկացվել: Մասնակիցները դեմ են արտահայտվել Միացյալ Նահանգների և Ռուսաստանի նախագահների հանդիպմանն ու կասկած հայտնել, որ այն կարող է նպաստել ռուս-ուկրաինական կարգավորմանը: Մի շարք ցուցարարներ էլ դժգոհել են, որ բանակցություններն անցնելու են առանց Ուկրաինայի նախագահի:
