Սպիտակ տան բանակցություններում չի բարձրացվել Կիևի կողմից տարածքներ հանձնելու հարցը՝ չնայած ԱՄՆ նախագահ Դոնալդ Թրամփի՝ փոխզիջման կոչերին: Այս մասին հայտարարել Է Ֆրանսիայի նախագահ Էմանուել Մակրոնը։
Լրագրողների այն հարցին, թե արդյոք Թրամփը խոսել է զիջումների անհրաժեշտության մասին՝ նախքան Ուկրաինային ԱՄՆ-ի անվտանգության որևէ երաշխիք տրամադրելը, Մակրոնը պատասխանել է. «ոչ, դա ընդհանրապես չի քննարկվել։ Մենք հեռու ենք դրանից»։
Ֆրանսիայի նախագահի խոսքով՝ Ռուսաստանի և Ուկրաինայի միջև ցանկացած ապագա խաղաղության համաձայնագիր չի կարող սահմանափակել ուկրաինական զինված ուժերի թվաքանակը: Դոնալդ Թրամփը և եվրոպացի առաջնորդները համաձայնել են «հզոր ուկրաինական բանակի գոյության անհրաժեշտության հետ, որը կարող է հետ մղել հարձակման ցանկացած փորձ», ինչպես նաև այն բանի հետ, որ այն չի ունենա «զենքի քանակի կամ հզորության որևէ սահմանափակում»:
Մակրոնը նաև կոչ է արել խստացնել Ռուսաստանի դեմ պատժամիջոցները, եթե ՌԴ նախագահ Վլադիմիր Պուտինը քայլեր չձեռնարկի Ուկրաինայի հետ խաղաղության հասնելու համար:
«Նախագահ Թրամփը հավատում է, որ մենք կարող ենք համաձայնության գալ, և կարծում է, որ նախագահ Պուտինը նույնպես ցանկանում է խաղաղության համաձայնագիր: Բայց եթե արդյունքում այդ գործընթացի պատասխանը լինի մերժումը, մենք պատրաստ ենք հայտարարել պատժամիջոցների խստացման անհրաժեշտության մասին», – հայտարարել է նա։
