Ռուսաստանի Դաշնությունը կողմ է, որ Եվրոպայից Ուկրաինայի համար կոլեկտիվ անվտանգության երաշխիքները լինեն իսկապես հուսալի: Այս մասին հայտնել է Ռուսաստանի արտաքին գործերի նախարար Սերգեյ Լավրովը։
«Ինչ վերաբերում է այն հաղորդագրություններին, որ Մեծ Բրիտանիան, Ֆրանսիան և Գերմանիան ցանկանում են մշակել կոլեկտիվ անվտանգության երաշխիքներ, մենք կողմ ենք, որ այդ երաշխիքները լինեն իսկապես հուսալի», – ասել է նա Հորդանանի արտաքին գործերի նախարար Այման ալ-Սաֆադիի հետ համատեղ մամուլի ասուլիսում։
Ինչպես նշել է նախարարը, Ռուսաստանը կարծում է, որ Ուկրաինայի համար երաշխիքների հարցում անհրաժեշտ է կենտրոնանալ 2022 թվականի Ստամբուլի բանակցություններում ձեռք բերված զարգացումների վրա։
«Ահա մենք ունենք շատ լավ օրինակ, որը, ի դեպ, վերաբերում է հենց ուկրաինական կողմի նախաձեռնությանը, ինչպես դա եղավ Ստամբուլում 2022 թվականի ապրիլին, երբ ուկրաինական բանակցային թիմը առաջարկեց ռազմական գործողությունների դադարեցման և կայուն կարգավորման ապահովման վերաբերյալ համաձայնագրի հիմնական սկզբունքները։ Այդ սկզբունքների թվում էր Ուկրաինայի հրաժարումը ՆԱՏՕ-ին կամ որևէ այլ ռազմական դաշինքին միանալուց, Ուկրաինայի չեզոք և ոչ միջուկային կարգավիճակի հաստատումը», – ընդգծել է Լավրովը։
