Թրամփի վարչակազմը հայտարարել է, որ վերանայում է ավելի քան 55 միլիոն վավեր ամերիկյան վիզա, որպեսզի բացահայտի ցանկացած խախտում, որը կարող է հանգեցնել վիզայի չեղարկման և արտաքսման։
Պետդեպարտամենտը հաստատել է, որ բոլոր վիզայի տերերը գտնվում են «շարունակական ստուգման» ռեժիմի տակ․ դիտարկվում են մնալու ժամկետի գերազանցման, քրեական գործունեության, ազգային անվտանգությանը սպառնալիքի և ահաբեկչության հետ կապերի տարբերակները։
Միևնույն ժամանակ, պետքարտուղար Մարկո Ռուբիոն հայտարարել է, որ ԱՄՆ-ն դադարեցնում է բեռնատարների վարորդներին աշխատանքային վիզաների տրամադրումը՝ պատճառաբանելով անվտանգության մտահոգությունները և ամերիկացի վարորդների աշխատանքային իրավունքների պաշտպանությունը։
Վերջին ամիսներին Թրամփի վարչակազմը կտրուկ ավելացրել է վիզաների չեղարկումները․ ըստ Պետդեպարտամենտի, ուսանողական վիզաների թիվը գրեթե չորս անգամ ավելի շատ է չեղարկվել, քան անցյալ տարի։
Փորձագետները զգուշացնում են, որ այս քայլերը կարող են խորացնել աշխատուժի պակասը։
