Այսպես կոչված «Զանգեզուրի միջանցքի» մաս կազմող Կարս-Իգդիր-Արալըք-Դիլուջու երկաթուղու հիմնարկեքի արարողությունը տեղի է ունենում Թուրքիայի Իգդիր քաղաքում։ Այս մասին հայտնում են տեղ լրատվամիջոցները:
«Կարս-Իգդիր-Արալըք-Դիլուջու երկաթուղին կդառնա Զանգեզուրի միջանցքի բանալին», – ասել է Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն։
Թուրքիան նախագծի իրականացման համար ներգրավել է 2.4 միլիարդ եվրո արտաքին ֆինանսավորում։ Երկաթուղու թողունակությունը կկազմի տարեկան 5.5 միլիոն ուղևոր և 15 միլիոն տոննա բեռ։
Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն նաև հայտնել է, որ Կարս–Իգդիր–Արալըք-Դիլուջու երկաթուղու կառուցմամբ իրենք ամենանշանակալի քայլերից մեկն են անում այսպես կոչված «Զանգեզուրի միջանցքի» իրականացման ուղղությամբ, որը կարևոր է ոչ միայն Թուրքիայի, այլև ամբողջ Հարավային Կովկասի և Եվրասիայի համար։
«Այսպես կոչված «Զանգեզուրի միջանցքը» կամրապնդի Թուրքիայի, Ադրբեջանի և Հայաստանի միջև տնտեսական համագործակցությունը, ինչպես նաև կնպաստի տարածաշրջանային խաղաղության զարգացմանը: Բոլոր երկրների համար, հատկապես նրանց համար, ովքեր շահագրգռված են Միջին միջանցքով, սկսվում է միջազգային առևտրի ոսկե դարաշրջանը»,-ասել է նախարարը:
