Ղազախստանի խորհրդարանի ստորին պալատն ընդունել է «Ղազախստանի Հանրապետության կառավարության և Հայաստանի Հանրապետության կառավարության միջև քաղաքացիների տեղաշարժի և մնալու մասին համաձայնագրի վավերացման մասին» օրինագիծը։ Այս մասին հաղորդում է «Ղազինֆորմ» գործակալությունը։
Ներքին գործերի նախարար Երժան Սադենովը լրատվամիջոցին ասել է, որ հիմա երկու պետությունների քաղաքացիները միմյանց երկրներ կարող են այցելել առանց վիզայի, անձը հաստատող փաստաթղթով։
Պաշտոնյան նշել է, որ երկու երկրների քաղաքացիները միմյանց տարածքում կարող են մնալ առանց ոստիկանության կնիքի մինչև 90 օր։
Համաձայնագիրը նաև նախատեսում է 90 օրից ավելի մնալու ժամկետը երկարաձգելու հնարավորություն՝ համաձայն ազգային օրենսդրության։ Դրա համար բավական է ստանալ ժամանակավոր բնակության թույլտվություն։ Թույլտվությունն այժմ տրամադրվելու է անվճար և աշխատանքային մեկ օրում։ Այսպիսով, փոխադարձ վիզային ռեժիմը վերացվում է, ինչը կնվազեցնի քաղաքացիների ծախսերը միմյանց այցելելիս։
Հայկական կողմը վավերացրել է համաձայնագիրը 2024 թվականի նոյեմբերի 15-ին։ Հաղորդվում է, որ ընդհանուր առմամբ, տարվա սկզբից Ղազախստան է մուտք գործել գրեթե 12 հազար Հայաստանի քաղաքացի։
