«Բազմաթիվ պետական սեփականության տարածքներ կան, որոնք այս կամ այն պետական մարմնին՝ Կադաստրի կոմիտեում ձևակերպված են, որպես սեփականություն, բայց հիմա դուք այս օրենքով ասում եք, որ դրանք բոլորը պետք է վարձակալության վերածվեն»,-կառավարության նիստում ասաց «Հայաստան» խմբակցության քարտուղար Արծվիկ Մինասյանը՝ անդրադառնալով կառավարության բերած օրենքի նախագծին, որով առաջարկվում է պետական բոլոր մարմինների և դպրոցների և բուհերի շենքերը տվյալ կառույցներին տալ վարձակալությամբ, իսկ այդ վարձակալության գումարները վճարելու է նույն պետությունը։
Մինասյանը հարցրեց, թե ինչպես է այն արվելու, երբ սեփականության հետվերցման գործընթաց է, որը լուրջ կարգավորում է նախատեսում, քանի որ առաջանում են բազմաթիվ ռիսկեր։
«Այս ռիսկերըը չգնահատելով, ասել, թե պետական եկամուտների գեներացիա է գնում, այդքան էլ այդպես չէ։ Մի գրպանից վերցվում, մյուս գրպանն է դրվում, բայց արհեստականորեն մեծանում է պետական բյուջեի մուտքերը և ծախսերը, որն իրականում արժեք չի ստեղծում»,-ասաց Մինասյանը և պնդեց, որ եթե անգամ այն արվում է շուկայում համադրելի գնագոյացում ստեղծելու համար, ապա այն լավագույն ձևը չէ, որ պետական կամ հանրային տարածքները շուկայական գներով պետական մարմնին վարձակալության հանձնելը կարող է ազդել շուկայի գնագոյացման վրա։
Նշելով, որ փոփոխության մեջ ռիսկն ավելի մեծ է քան ակնկալվող օգուտը՝ Միանսյանն ճշտեց. «Եթե, իհարկե, օգուտ ասելով մենք չենք հասկանում հանրային քարոզչությունը, թե՝ տեսեք իշխանությունները պետական բյուջեի եկամուտներն ու ծախսերն ինչքան ավելացրեց, բոլորս էլ հականում ենք, որ դրանք մի գրպանից վերցնելու և մյուս գրպան տալու պրոցես է։ Բայց սա բերելու է պետական համակարգի որոշ գործառույթների ոչ արդյունավետ իրականացմանը»։
