«Ապրիլի 19-ը, որպես հարկատուի օրը ոչ թե նրա համար է, որ հարկատուի վզին փաթաթվի հարկն ամեն գնով հավաքելու իմաստով, և ոչ էլ պետք է հանրությանը համոզել կամ բացատրել, որովհետև իրենք էլ շատ լավ գիտեն հարկն ինչ է և այն պետք է վճարեն, այլ պետք է ապահովել պարզ բան՝ արդարության սկզբունքը»,-խորհրդարանում ՊԵԿ տարեկան զեկույցի ժամանակ ասաց «Հայաստան» խմբակցության պատգամավոր Թադևոս Ավետիսյանը։
Ըստ նրա, երբ աշխատող աղքատը տեսնում է, որ պետություն իրենից նույն դրույքաչափով հարկ է վերցնում, ինչը միլիոնավոր դրամների աշխատավարձ և եկամուտ ստացողից, ապա այն աշխատող աղքատի համար հասկանալի չէ։
Ավետիսյանն ասաց, որ արդարաության սկզբունքին հակասում է նաև այն գործողությունը, երբ պետությունը տնտեսվարողին ասումէ, որ իր շրջանառության 20%-ը շահույթ է գնահատում և այն պետք է հարկի։
«Այ սրանք է, որ հարկային տեռորի և հարկ քերթելու դրսևորումներ ունեն»,-ասաց ընդդիմադիր պատգամավորը և օրինակ բերեց իրավիճակը, երբ հարկային տեսուչը մեկ տնտեսվարողի վրա 50 անգամ ավել ակտ է գրում, քան իրականում կա և կանչում առանձին բանակցում են քննիչների կաբինետներում, այն հարկային տեռոր է և կապ չունի արդյունավետ հարկհավաքման հետ։
Ավետիսյանը կարևորեց նաև հավաքված հարկերի օգտագործման արդյունավետությունը և երբ հարկատուն տեսնում է, թե իշխանությունները ինչպես են մսխում հարկերը մեկ անձից իշխանամերձերից գնումներ անելով կամ ԱՆԻՖ -ի նման գումարները փոշիացնելով, արդյունքում խախտվում է արդարության սկզբունքը ։
«Սա կոմպլեքս պետք է դիտարկեք, հակառակ պարագայում, ինչքան էլ համոզեք՝ հարկատուն չի դառնա ձեր ուզած հերոսը։ հարկատուն հենց նույն ՀՀ քաղաքացին է, հերոսն է, նա հերոս է՝ առաջին հերթին, երբ իր հայրենիքն է պաշտպանում, ընտանիք է կազմում… Եթե մի մասը հերոս չի, ապա այդտեղ միայն դուք եք մեղավոր՝ որպես իշխանություն»,- հայտարարեց Թադևոս Ավետիսյանը։
