«Հայաստանի կողմից բանակցողները գտնվում են պարտադրանքի, ճնշումների ներքո, չեն կարողանում լիարժեք ներկայացնել մեր շահերը։ Դժվար իրավիճակ է ստեղծված։ Նման իրավիճակում եզրակացությունը մեկն է՝ մեր ժողովուրդը պետք է փոփոխի բանակցողներին»,- խորհրդարանական ճեպազրույցի ժամանակ ասաց «Հայաստան» խմբակցության ղեկավար Սեյրան Օհանյանը։
Նա նշեց, որ ցանկացած նոր ուժի առաջնահերթ խնդիրներից պետք է լինի իրական, ազգային երաշխիքների ձևավորումը՝ բանակ, ներքին ամրություն. «Այնուհետև, եթե ներքին ամրությունը կա, ապա մեր շահերից բխող վերաբանակցություններ։ Պետք է կետ առ կետ անցնել բոլոր պայմանավորվածություններով։
Մենք տեսնում ենք միակողմանի պարտադրանք, հռետորաբանություն, հակառակորդի կողմից հնչում են խոսքեր, որոնք հակասում են այն փաստաթղթերին, որոնք գոյություն ունեն»,- ասաց ընդդիմադիր խմբակցության ղեկավարը։
Նա նշեց, որ հայ-թուրքական բանակցություններում նախապայմանները շարունակվում են։ Ըստ նրա, հայ-թուրքական հարաբերություններում ակտիվությունը պայմանավորված է Վաշինգտոնում ստորագրված փաստաթղթեի հետ։
«Անխոչընդոտ ճանապարհը և «Թրամփի ուղու» գաղափարներից մեկը «Մեծ Թուրանի» ճանապարհն է, որը բոլոր թուրքախոս ժողովուրդների համար ռազմավարական նպատակ ունի»,- ասաց Ս.Օհանյանը։
