Նոյեմբերի 16-ին Վաղարշապատ խոշորացված համայնքում տեղի են ունենալու ՏԻՄ ընտրություններ։ «Հայրենիք» կուսակցությունը համայնքապետի թեկնածու է առաջադրել բանաստեղծ-հրապարակախոս Խաչիկ Մանուկյանին։
«Վստահ եմ՝ պարոն Մանուկյանը հենց այն անձն է, ով կարող է ստանձնել մեր հոգևոր մայրաքաղաքի ղեկավարի պաշտոնը և իր աշխատասիրությամբ ու նվիրումով նոր շունչ տալ Էջմիածնի և հարակից գյուղերի զարգացմանը։ Միասին մենք հաղթանակ կկերտենք նախ Վաղարշապատում, ապա նաև ամբողջ Հայաստանում։ Ի գործ, սիրելի թիմակիցներ։ Աստծով»,-ֆեյսբուքյան իր էջում գրել է «Հայրենիք» կուսակցության նախագահ Արթուր Վանեցյանը։
ԱԱԾ նախկին տնօրենը նշել է, որ «Հայրենիք»-ը հանրապետության բոլոր համայնքներում բացում է նոր գրասենյակներ, ինչն ինքնանպատակ չէ։
«Շփվել ժողովրդի հետ, հասկանալ, թե ինչ խնդիրներ կան մեր ժողովրդի մոտ և այդ խնդիրներին տալ լուծումներ»,-Վաղարշապատում կուսակիցների, համակիրների հետ հանդիպմանն ասել է նա։
«Հայրենիք»-ի կողմից քաղաքապետի թեկնածու առաջադրված Խաչիկ Մանուկյանը նշել է, եթե չմասնակցեր ընտրություններին, կհամարեր, որ դավաճանում է իր քաղաքին, իր հայրենակցին։
«Քանի որ հիմա ճակատագրական պահեր են, վստահ եմ, որ ողջ հայության հայացքը լինելու է դեպի Էջմիածինը՝ որպես հոգևոր կենտրոն։ Վստահ եղեք, մենք այդ հաղթական քայլերն անելու ենք։ Ինչո՞ւ «Հայրենիք»-ի հետ, որովհետև թարմ ուժ է, նոր ուժ է՝ երիտասարդներով լի, մտածողներով լի, գիտնականներով լի։ Ամեն անգամ այս գրասենյակում ես տեսնում եմ այն երևելիներին, որոնք իսկապես նվիրում ունեն մեր ազգին, մեր երկրին։ Մենք չենք վախենում հաղթություն բառն արտաբերելուց, մենք չենք կարող պարտությունը հաղթանակ համարել, մենք իրական հաղթանակներով ենք շարժվելու»,-իր ելույթում ասել է Խաչիկ Մանուկյանը։
