Արցախի ԱԺ նախկին պատգամավոր, քաղաքական վերլուծաբան Վահրամ Աթանեսյանը «Ֆեյսբուքի» իր էջում գրել է.
Ի՞նչ է նախորդել Կովկասի բոլշեւիկացմանը: Բրիտանական զորքերի դուրսբերում, Ռուսաստանի սպիտակգվարդիական ուժերին ռազմական օգնության դադարեցում, Դենիկինի բանակի կազմալուծում եւ էվակուացիա:
Գերթե ունիսոն՝ Անտանտի երկրները մերկացրել են Մուստաֆա Քեմալի դեմ պատերազմող հունական զորքերի թիկունքը: Մեկ դար հետո Միացյալ Նահանգներն Ուկրաինայի հարցում Սիմոն Վրացյանի ասած՝ «կադրիլ են պարում». մերթ սպառազինություն են մատակարարում, մերթ՝ օգնությունը դադարեցնում: Իսկ Եվրոպան մի կողմից «պատժամիջոցներ է կիրառում», մյուս կողմից՝ մնում ռուսական նավթի խոշոր գնորդ: Այսինքն, փաստացի ֆինանսավորում է Ուկրաինայի դեմ Պուտինի ագրեսիան: Անքորիջում Թրամփը պոստխորհրդային տարածքը «հանձնել է Ռուսաստանի՞ն»: Ոչ մի ծրագրավորում գործունակ չէ, եթե այս հարցի պատասխանը չկա: Իսկ «չկա»-ն հղի է ապակայունացման պոտենցիալով:
Բայց Հայաստանի ընդդիմությունը կամ նրա մի թեւը շարունակում է «իմպիչմենտ-չիմպիչմենտ» խաղալ եւ հանրության որոշակի հատվածի կրկին մատնում դիվուդադարի: Էդ քաղաքական «կամիկաձեության» խորքում ի՞նչ կա, որեւէ մեկը փորձու՞մ է իմանալ:
