Reuters-ի տվյալներով՝ Վաշինգտոնը վերսկսում է զենքի վաճառքը Ուկրաինային՝ դաշնակիցների հետ նոր ֆինանսական համաձայնագրի շրջանակներում։ ԱՄՆ նախագահ Դոնալդ Թրամփի վարչակազմն առաջին անգամ հավանություն է տվել Ուկրաինային զենքի նոր մատակարարումներին, գրում է գործակալությունը՝ վկայակոչելով գործընթացին ծանոթ երկու աղբյուրի:
Ըստ Reuters-ի՝ Թրամփը պնդել է, որ ամերիկյան պաշարներից զենքի գնումը ֆինանսավորեն ՆԱՏՕ-ի երկրները։ Պաշտպանության նախարարի քաղաքական հարցերով տեղակալ Էլբրիջ Քոլբին հավանություն է տվել Ուկրաինային 500 մլն դոլարի սպառազինությունների երկու մատակարարմանը: Դրանք շուտով կուղարկվեն Ուկրաինա, հաղորդել են Reuters-ի զրուցակիցները:
Գործակալությունը հայտնել է, որ սա «Ուկրաինայի առաջնահերթ պահանջների ցանկ» (PURL) անվամբ նոր մեխանիզմի առաջին կիրառումն է, որը մշակել են Միացյալ Նահանգներն ու նրա դաշնակիցները։
