Անկախ երկրների միջև, ինչպիսիք են Իրանն ու Ռուսաստանը, հաջող համագործակցության մոդելը կապացուցի, որ աշխարհում միակողմանիության դարաշրջանն ավարտվել է, և մենք կարող ենք ապահովել մեր երկրների բարգավաճումն ու առաջընթացը՝ առանց միակողմանի տերություններից կախվածության։ Այս մասին հայտարարել է Իրանի Իսլամական Հանրապետության նախագահ Մասուդ Պեզեշքիանը Ռուսաստանի էներգետիկայի նախարարի հետ հանդիպման ժամանակ, հաղորդում է IRNA–ն։
Չորեքշաբթի երեկոյան՝ սեպտեմբերի 17-ին, Ռուսաստանի էներգետիկայի նախարար Սերգեյ Ցիվիլևի և նրան ուղեկցող պատվիրակության հետ հանդիպման ժամանակ Պեզեշքիանը գոհունակություն է հայտնել Իրանի և Ռուսաստանի միջև համագործակցության առաջընթացի կապակցությամբ։
Պեզեշքիանն ընդգծել է, որ Իրանի Իսլամական Հանրապետությունը լուրջ է վերաբերվում երկու երկրների միջև համաձայնագրերի իրականացմանը և ստեղծել է համագործակցության համար անհրաժեշտ բոլոր պայմանները։ Ինչպես նշել է Իրանի պետության ղեկավարը, «Թեհրանի և Մոսկվայի միջև համագործակցության և երկկողմ համաձայնագրերի իրականացման համար որևէ խոչընդոտ չկա»։
