«Ունենք կայացած մրցույթ, արդեն իսկ գնած 30 տրոլեյբուս, իսկ այս 45 նոր տրոլեյբուսը, որոնք կառավարության աջակցությամբ կգնենք, ամբողջապես կթարմացնի մեր տրոլեյբուսային պարկը, և այլևս քաղաքում չենք ունենա հին տրոլեյբուսներ»,- կառավարության նիստին հայտարարել է Երևանի քաղաքապետ Տիգրան Ավինյանը։ 2026թ. առաջին եռամսյակում բոլոր նոր տրոլեյբուսներն արդեն կլինեն Երևանում
Քաղաքապետի խոսքով՝ այս գնմամբ Երևանի տրոլեյբուսային պարկն ամբողջապես թարմացնում է կազմը։
Ինչ վերաբերում է առաջիկա ծրագրերին, քաղաքապետը նշեց. «Այս մի քանի տարիների ընթացքում մենք հասցրել ենք գնել 87 հատ 12 մետրանոց ավտոբուս, 562 հատ 8.6 մետրանոց ավտոբուս և 30 նոր տրոլեյբուս, որ գծերից անջատ կարող են հավելյալ 60 կմ երթևեկել՝ անկախ միացված լինելուց»։
Նա նաև շեշտեց, որ նոր շարժակազմերը լինելու են էլեկտրական. «Բոլոր մնացած շարժակազմերը, որ պետք է ձեռք բերենք, միմիայն էլեկտրական պետք է լինեն, մենք այլևս չենք էլ քննարկում ներքին այրման շարժիչով աշխատող ավտոբուսներ գնելը»։
Ինչ վերաբերում է վերելակներին, մինչև այս տարվա վերջ 507 վերելակ է փոխվելու Երևանում: «Եվս 3 տարի այս նույն տեմպը պահպանելով, երրորդ տարում մի փոքր ավելի գնում անելով՝ Երևան քաղաքում վերելակային ֆոնդը կրկին վերազինում ենք, և հին վերելակային ֆոնդից նշույլ անգամ չի մնա»,- ասաց Ավինյանը:
