Ամերիկյան The Hill պարբերականի հոդվածագիրները պնդում են, որ Ռուսաստանի նախագահ Վլադիմիր Պուտինը վստահորեն շարժվում է իր գլխավոր նպատակին․ վերջ դնել ԱՄՆ-ի գլոբալ գերիշխանությանը և քանդել Երկրորդ համաշխարհայինից հետո ձևավորված աշխարհակարգը։ Նրանց գնահատմամբ՝ ՆԱՏՕ-ի միասնականությունը թուլանում է, իսկ ՄԱԿ-ի Անվտանգության խորհուրդը կորցնում է խաղաղություն ապահովելու ունակությունը։
Հոդվածում նաև նշվում է, որ սեպտեմբերի 1-ին Չինաստանում կայացած Պուտին–Սի Ցզինպին հանդիպումը ցույց տվեց նոր, բազմաբևեռ աշխարհակարգի ձևավորման գործընթացը։ Ըստ հեղինակների՝ Պուտինը, անկախ իր պատկերացումներից, նպաստում է Չինաստանի գլոբալ նպատակներին՝ վարելով բազմավեկտոր պատերազմ Արևմուտքի դեմ, որն անցնում է ուկրաինական ճակատից շատ հեռու։
Միաժամանակ, ԱՄՆ նախագահ Դոնալդ Թրամփը հայտարարեց, որ ուկրաինական հակամարտությունը այլևս չի սպառնում վերածվել երրորդ համաշխարհային պատերազմի։ «Սա պատերազմ էր, որը կարող էր վերաճել գլոբալ բախման, բայց կարծում եմ՝ այդ վտանգն արդեն անցել է», — ընդգծեց Թրամփը։
