«Տաշիր» ընկերությունների խմբի փոխնախագահ Նարեկ Կարապետյանը ֆեյսբուքյան գրառմամբ արձագանքել է օրեր առաջ ՀԷՑ կառավարիչ նշանակված ՔՊ-ական Ռոմանոս Պետրոսյանի հայտարարություններին.
«9 ամիս է` նշանակվել եմ ՀԷՑ-ի տնօրենների խորհրդի նախագահ: Առաջին իսկ օրվանից հրաժարվել եմ աշխատավարձից և 9 ամսում ՀԷՑ-ից ստացել եմ 0 դրամ:
Հասանելիք աշխատավարձս ուղղվել է էներգետիկ համակարգում ցածր վարձատրվող աշխատակիցների պարգևավճարների բյուջե: Խնդրում եմ «փաստեր» նշելուց մի նշեք այնպես, որ դրանք մարդկանց հատուկ շփոթության մեջ գցեն»։
Սեպտեմբերի 20-ին ՔՊ 7-րդ համագումարին շտապող Ռ. Պետրոսյանին լրագրողները հարցրել էին՝ ճի՞շտ են այն տեղեկությունները, որ նա ՀԷՑ-ից 7 մլն դրամ աշխատավարձ է ստանում։
«Դա անձնական տվյալ է, չեմ ուզում հրապարակել, բայց դուք կտեսնես իմ հայտարարգրի մեջ։ Ավելին ասեմ, այդ սուբյեկտները, որ նման թվեր են վկայակոչում, նրանց ստացած տասնյակ միլիոնանոց պարգևավճարներից ես ու նշանակած թիմը հրաժարվել ենք, ու բոլորն ուղղել ենք ՀԷՑ-ի սոցիալական ամենաներքևի շեմին»,-պատասխանել էր Պետրոսյանը։
