«Որևէ վարկած, պատճառ, որ կարելի է մտածել, որ այսպիսի բան կարող էր լինել և՛ մեր, և՛, վստահ եմ, նաև Վալոդյայի համար, զարմանալի էր, որովհետև օր ու գիշեր լծված էր համայնքի խնդիրների լուծմամբ, բնակիչների հետ հանդիպումներով»,-Փարաքարի համայնքապետ Վալոդյա Գրիգորյանի սպանության վայրում ասաց «Ապրելու երկիր» կուսակցության համահիմնադիր Մեսրոպ Առաքելյանը։
Նա ասաց, որ կատարվածն անձնական ողբերգություն է, քանի որ Վալոդյա Գրիգորյանն իր մտերիմ ընկերն էր։
Առաքելյանը բացառեց, որ որևէ մեկի հետ Գրիգորյանը կոնֆլիկտ կամ խնդիր ունենար։
«Ապրելու երկիր» կուսակցության համահիմնադիրը հայտնեց, որ համայնքի ղեկավարը մեծ աշխատանքներ էր տանում համայնքում, իր թիմի հետ միասին։
«Համայնքի բնակիչները միշտ իր աշխատասենյակում էին և նրանք իրենց գոհունակությունն էին հայտնում, որ համայնքի բազմաթիվ խնդիրներ են լուծվել։ Շատ սիրված էր համայնքի բնակիչների կողմից և վերջին ընտրություններից հետո այն աշխատանքները, որ կատարվել էր, այդ վստահությունն ամրապնդել էր»,- ասաց Առաքելյանը։
Նա տարակուսեց, որ համայնքում նախկինում տեղի ունեցած սպանությունից հետո կանխարգելիչ գործողություններ չէին արվել և արդյունքում փողոցում համայնքի ղեկավար և ոստիկան էր սպանվել։
