Ազգային ժողովում քննարկվում է կառավարության ներկայացրած «Թափոնների մասին» օրենքում փոփոխություններ և լրացումներ կատարելու մասին և Վարչական իրավախախտումների վերաբերյալ Հայաստանի Հանրապետության օրենսգրքում լրացում կատարելու մասին նախագծերի փաթեթը։ Զեկուցողն է ՀՀ շրջակա միջավայրի նախարարի տեղակալ Արա Մկրտչյանը։
ԱԺ «Հայաստան խմբակցության քարտուղար Արծվիկ Մինասյանն ասաց, որ այս ոլորտը ներկայումս էլ գտնվում է բավականին անկառավարելի վիճակում։
«Դուք հանրության առողջությունը ենթարկում եք ռիսկի, չեմ վարանում ասել՝ պոպուլիստական նպատակով։ Տնտեսվարող սուբյեկտների անունն ենք շահարկում։ Ավելի լավ է օգնեք տնտեսվարող սուբյեկտներին, որպեսզի իրենց մոտ անվտանգության համակարգերը ստեղծեն, ոչ թե հայտարարեք՝ որ չտուգանենք, հանում ենք այդ պահանջը։ Այդպես ցանակացած բան կարող եք ասել։ Ի վերջո խոսքը վտանգավոր թափոնների մասին է»,- ասաց Մինասյանը։
Նա նշեց, որ եթե մեկ տարվա ընթացքում են ընդունվելու նոր ակտեր, նշանակում է սրա բացասական հետևանքները կրելու են քաղաքացիները։
«Թափոնների մասին» օրենքում փոփոխություններ և լրացումներ կատարելու մասին» օրենքի նախագծի ընդունմամբ նախատեսվում է ամրագրել, հստակեցնել Կառավարության, շրջակա միջավայրի և առողջապահության նախարարությունների որոշ իրավասությունները, մասնավորապես՝ օրենքով սահմանել թափոնների կառավարման ոլորտը կանոնակարգող որոշ նորմատիվ իրավական ակտերի ընդունման համար իրավական հիմքը:
Նախատեսվում է Օրենքով ամրագրել վտանգավոր թափոնների գործածության գործունեության լիցենզավորմանը վերաբերող կարգավորումները:
Նախատեսվում է Օրենքում որոշ լրացումների կատարմամբ հստակեցնել թափոնների հաշվառման, վտանգավոր թափոնների անձնագրավորման, վիճակագրական հաշվետվությունների ներկայացման, ինչպես նաեւ թափոնների հեռացման վայրերում մոնիթորինգի եւ ուսումնասիրությունների իրականացման գործընթացները:
