ԱՄՆ նախագահ Դոնալդ Թրամփը հայտարարել է, որ պաղեստինյան ՀԱՄԱՍ խմբավորումը «երեք կամ չորս օր» ունի Գազայի հրադադարի վերաբերյալ իր առաջարկին արձագանքելու՝ հայտնում է Al Jazeera-ն:
«ՀԱՄԱՍ-ը կամ կանի դա, կամ ոչ, իսկ եթե ոչ, դա շատ տխուր ավարտ կունենա»,- հայտարարել է Սպիտակ տան ղեկավարը և ընդգծել, որ իսրայելցի և արաբ առաջնորդներն արդեն ընդունել են իր ծրագիրը։
Թրամփի մեկնաբանությունները հնչել են Սպիտակ տան կողմից 20 կետից բաղկացած փաստաթղթի հրապարակումից մեկ օր անց, որով կոչ է արվում անհապաղ հրադադար հաստատել Գազայի հատվածում, ՀԱՄԱՍ-ի կողմից պահվող իսրայելցի գերիներին փոխանակել իսրայելական բանտերում գտնվող պաղեստինցիների հետ և իսրայելական զորքերը փուլ առ փուլ դուրս բերել Գազայից:
Ըստ այդ առաջարկի՝ ՀԱՄԱՍ-ը պետք է զինաթափվի, իսկ ԱՄՆ-ն կաշխատի արաբական ու միջազգային գործընկերների հետ՝ ստեղծելու «ժամանակավոր միջազգային կայունացնող ուժեր»:
Ծրագրում նաև ասվում է, որ ՀԱՄԱՍ-ը ոչ մի դեր չի խաղալու Գազայի հատվածի կառավարման գործում։ Շարժման անդամներին կառաջարկվի համաներում՝ «խաղաղ գոյակցության» պարտավորություն ստանձնելու դեպքում, իսկ անկլավը լքել ցանկացողներին կտրամադրվի անվտանգ մեկնում արտասահման:
Թրամփը հայտարարել է, որ ծրագիրը նախատեսում է նաև պաղեստինցի տեխնոկրատների անցումային կառավարության ստեղծում՝ Գազայի հատվածում առօրյա կյանքն ապահովելու համար, ինքնակառավարում, տեղահանված բնակիչների վերադարձ և երաշխիքներ, որ «Գազայի բնակիչները չեն վտարվի»:
Ըստ Al Jazeera-ի՝ Կատարի արտաքին գործերի նախարարությունը հաստատել է, որ մինչ Իսրայելը շարունակում է Գազայի վրա հարձակումը, ՀԱՄԱՍ-ի բանակցային խումբն ուսումնասիրում է Թրամփի ծրագիրը:
Կատարի վարչապետ Շեյխ Մուհամմեդ բին Աբդել Ռահման բին Ջասիմ ալ Թանին հեռուստաալիքին ասել է, որ առաջարկի որոշ կետեր հստակեցում և քննարկում են պահանջում:
Այնուամենայնիվ, նա հույս է հայտնել, որ բոլոր կողմերը «կառուցողական մոտեցում կցուցաբերեն ծրագրին և կօգտվեն պատերազմը դադարեցնելու հնարավորությունից»։
Իր հերթին, ՖԱԹՀ-ը, որը գերիշխող ուժն է Արևմտյան ափին գտնվող Պաղեստինի ինքնավարությունում, հայտարարել է, որ ողջունում է ԱՄՆ-ի ջանքերը՝ պատերազմը դադարեցնելու և քաղաքացիական բնակչությանը պաշտպանելու համար։
Պաղեստինյան Wafa լրատվական գործակալության տվյալներով՝ ՖԱԹՀ-ը հայտարարել է, որ պատրաստ է համագործակցել բոլոր կողմերի հետ՝ հրադադարի հասնելու, Գազա մարդասիրական օգնություն հասցնելու, գերիների և պաղեստինցի բանտարկյալների ազատ արձակման ու պաղեստինցիների պաշտպանության միջազգային մեխանիզմներ ստեղծելու հարցում: Խումբը նաև վերահաստատել է Պաղեստինի նախագահ Մահմուդ Աբբասի խոստումը՝ ընտրություններ անցկացնել պատերազմի ավարտից հետո մեկ տարվա ընթացքում:
