Եթե 44-օրյա պատերազմի հանգամանքներն ուսումնասիրող հանձնաժողովի զեկույցն Ազգային ժողովի լիագումար նիստի օրակարգ չի մտնում՝ նշանակում է զեկույցը գոյություն չունի։ Այս մասին հոկտեմբերի 2-ին ԱԺ-ում լրագրողների հետ զրույցում հայտարարել է ԱԺ Պաշտպանության և անվտանգության մշտական հարցերի հանձնաժողովի նախագահ Անդրանիկ Քոչարյանը՝ արձագանքելով ԱԺ նախագահ Ալեն Սիմոնյանի հայտարարությանը։
Սիմոնյանն այսօր Ազատությանն ասել է, որ 44-օրյա պատերազմի հանգամանքների վերաբերյալ զեկույցը կքննարկվի ոչ թե լիագումար նիստում, այլ փակ լսումների ընթացքում։
Նախօրեին ԱԺ նախագահը նաև հայտարարել էր, որ 44-օրյա պատերազմի հանգամանքներն ուսումնասիրող քննիչ հանձնաժողովի զեկույցն Ազգային ժողովի լիագումար նիստերի օրակարգ ներառելու իրավական հիմք չկա։
Իր դիրքորոշումը հիմնավորելու համար Ալեն Սիմոնյանը նշել էր, որ հարցի վերաբերյալ ստացել է ԱԺ պետաիրավական հանձնաժողովի և իրավաբանական վարչության եզրակացությունները։
Քոչարյանը վստահեցրել է, որ իր և Սիմոնյանի միջև այս հակասությունը քաղաքական հիմք չունի, խնդիրն իրավական է։ Նա նաև կասկածի տակ է դրել ԱԺ պետաիրավական հարցերի մշտական հանձնաժողովի կողմից տրված ենթադրյալ բացասական եզրակացության գոյությունը՝ պահանջելով տեսնել համապատասխան որոշումը։
«Եթե խոսք է գնում, որ պետաիրավական հանձնաժողովի եզրակացություն կա, ես կուզեի տեսնել։ Վլադիմիր Վարդանյանը Հայաստանում չէ, երբ գա, կտեսնենք, թե պետաիրավական հանձնաժողովը ի՞նչն է ուսումնասիրել, որ Ազգային ժողովի նախագահին ասել է՝ խնդիր կա»,-ասել է Քոչարյանը։
Քոչարյանը ընդգծել է, որ նման բարդության զեկույցի համար գործող ժամկետներն անբավարար են եղել և պետք էր օրենսդրորեն վերանայել հանձնաժողովների աշխատանքային կարգավորումները։
«Դուք չգիտեի՞ք, որ այսպիսի բարդ, ծավալուն աշխատանք առաջին անգամ է արվում։ Եթե այդ ժամկետով եք անում, դուք որակյալ զեկույց չեք ունենա։ Գուցե պետաիրավական հանձնաժողովը հենց սկզբից մտածեր այդ ժամկետներն ընդհանրապես հանելու մասին նմանատիպ հանձնաժողովների համար», – ասել է նա։
Քոչարյանը հղում է արել Կանոնակարգ օրենքի հոդվածներին՝ պնդելով, որ դրանց մեկնաբանության հարցում օրենսդիրն արդեն նախկինում ստեղծել է նախադեպ, մասնավորապես՝ քառօրյա պատերազմի զեկույցի ժամանակ։
«Եթե ժամկետների խախտման խնդիր կա, չէ՞ որ քառօրյայի ժամանակ էլ էին խախտված, բայց օրենսդիրը մեկնաբանությունը տվել է։ Դա խախտել չի կարելի։ Ցանկացած իրավաբանի հարցնեք, կասի՝ նախադեպ կա», – նշել է Քոչարյանը։
Ըստ Քոչարյանի՝ 215 էջանոց զեկույցը, որը հիմնված է տասնյակ հազարավոր փաստաթղթերի, տեսաձայնային նյութերի վրա, պարունակում է տեղեկություններ «դավաճանների, մեղավորների» մասին, և դրա քննարկումը պետք է լինի փակ՝ Ադրբեջանի հետ խաղաղության օրակարգում շահարկումներից խուսափելու նպատակով, սակայն պարտադիր կերպով՝ լիագումար նիստի շրջանակում։
