Հայաստանի ԳԽ և Արցախի ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է.
Ո՞վ է Նատալի Ալեքսանյանը, ո՞ր լրատվամիջոցում է աշխատում, քաղաքական ի՞նչ հայացքներ ունի,-իր անձնական գործն է: Նա իրավունք ունի չհամակրել Սամվել Բաբայան քաղաքական գործչին, չկիսել նրա մոտեցումները, չընտրել նրան: Բայց նա իրավունք չունի Պաշտպանության բանակի նախկին հրամանատարին քրեական անցյալ վերագրել: Մանավանդ որ Բաբայանի դեմ ժամանակին քրեական գործ է հարուցվել եւ Նատալի Ալեքսանյանի կողմից նրան մեղսագրված ոչ մի արարք դատարանում չի ապացուցվել:
Նատալի Ալեքսանյանը, գուցե, չի տեսնում իր հակաբաբայանական քարոզչության վտանգավորությունը, բայց ՊԲ հրամանատար Սամվել Բաբայանին ներկայացնել որպես «հրեշի», նշանակում է հեղինակազրկել ղարաբաղյան առաջին պատերազմը, պետականաշինության առաջին եւ ամենածանր փուլը: Այդ նարատիվը վաղը կարող է բումերանգով հարվածել Հայաստանի միջազգային վարկանիշին: Բաբայանն, իհարկե, ունեցել է թերություններ եւ լուրջ սխալներ է գործել: Բայց 2019թ. 25 հազար արցախցի ստորագրել է, որպեսզի նրան նախագահի թեկնածու առաջադրվելու իրավունք ընձեռնվի: Դա համաժողովրդական գնահատական է: Եւ ոչ ոք չի կարող ասել, թե ի՞նչ ընթացք կունենային ռազմա-քաղաքական զարգացումները, եթե Բաբայանը 2020 թվականին ընտրվեր Արցախի նախագահ:
Ասվածը ոչ մի կապ չունի Բաբայանի այսօրվա կողմնորոշման եւ նրա քաղաքական հայացքները կիսելու հետ: Բայց քաղաքական գործչին պետք է հակադարձել քաղաքական փաստարկներով:
