Իրանի ԱԳՆ-ն հայտարարել է, որ 2015 թվականի միջուկային գործարքի դրույթները 10-ամյա ժամկետի ավարտից հետո ուժը կորցրած են համարվում: Գերատեսչությունից նշել են, որ Թեհրանը շարունակում է հավատարիմ մնալ դիվանագիտությանը:
«Թիվ 2231 բանաձևի գործողության ժամկետի ավարտից հետո Իրանի միջուկային ծրագիրը պետք է դիտարկվի այնպես, ինչպես Միջուկային զենքի չտարածման մասին պայմանագրի ցանկացած այլ մասնակից և միջուկային զենք չունեցող պետության ծրագրերը»,- նշել են Իրանի ԱԳՆ-ից:
Իրանական գերատեսչությունը քննադատել է նաև «եվրոպական եռյակին»՝ Մեծ Բրիտանիային, Ֆրանսիային և Գերմանիային, նշելով, որ նրանք չեն կատարել համաձայնագրով ստանձնած պարտավորությունները: Իրանն ընդգծել է, որ ՄԱԿ-ի պատժամիջոցները վերականգնելու վերաբերյալ նրանց որոշումը իրավական ուժ կամ հետևանք չպետք է ունենա:
Միջուկային գործարքը կամ Իրանի միջուկային ծրագրի վերաբերյալ Գործողությունների համատեղ համապարփակ ծրագիրը 2015 թվականին ստորագրել են Իրանը, ԱՄՆ-ը, Ռուսաստանը, Չինաստանը, Գերմանիան, Ֆրանսիան և Մեծ Բրիտանիան: ԱՄՆ-ը Դոնալդ Թրամփի նախագահության առաջին ժամկետի ընթացքում միակողմանիորեն դուրս է եկել համաձայնագրից: ՀԳՀԾ-ի պայմանների կատարմանը վերադառնալու շուրջ բանակցությունները սկսվել են Վիեննայում 2020 թվականի ապրիլին, սակայն փակուղի են մտել։ 2025 թվականի ընթացքում ԱՄՆ-ի և Իրանի միջև տեղի ունեցան նաև նոր միջուկային գործարքի շուրջ բանակցությունների մի քանի փուլեր, սակայն դրանք ընդհատվեցին Իրանի միջուկային ծրագրի դեմ Իսրայելի և ԱՄՆ-ի ռազմական գործողությամբ:
