Կառավարության նիստում էկոնոմիկայի նախարար Գևորգ Պապոյանը հայտարարեց, որ արդեն մթերվել է 211 հազար տոննա խաղող։ Համեմատության համար հիշեցրեց, որ նախորդ տարի մթերման ծավալը եղել է 164 հազար 200 տոննա։
Պապոյանը նշեց, որ «Արենի» սորտի խաղողի մթերումը շարունակվում է, վերջին օրերին մթերում են նաև խաղողի սեղանի սորտեր։
«Առաջիկա 1-2 օրերiն ամբողջությամբ կավարտենք մթերման պրոցեսը»,- ասաց նա։
Նիկոլ Փաշինյանը նշեց, որ Հայաստանում խաղողի ոլորտում խորքային փոփոխություններ են տեղի ունենում՝ «ուզենք-չուզենք»։
«Մենք չենք կարող այդ փոփոխությունները կասեցնել, բայց պետք է ամեն ինչ անենք, որ մեր գյուղատնտեսությունն ադապտացվի այդ փոփոխություններին»,- ասաց նա՝ հստակեցնելով, որ այդ փոփոխությունների մի մասը կապված է կոնյակ, ոչ կոնյակ խնդրի հետ։
«Էն որ ես ասում եմ՝ Հայաստանում չի կարող կոնյակ արտադրվի, հիմք է տալիս ինձ մեղադրելու հերթական անգամ մեր ազգային արմատներից կտրվելու մեջ։ Մենք պետք է այս տեղեկությունն իմանանք՝ կոնյակ կարող է արտադրվի միայն Ֆրանսիայի Կոնյակ երկրամասում աճեցված խաղողից։
Հայաստանում չի կարող շամպայն լինել, որովհետև շամպայն արտադրվում է միայն այն խաղողից, որը Ֆրանսիայի Շամպայն ռեգիոնում է աճում։
Ժողովուրդ ջան, հայկական կոնյակ հասկացություն չի կարող լինել, չի կարող լինել, ոնց որ չի կարող լինել Դիլիջանի ջերմուկ»,- ասաց Փաշինյանը։
