ԱՄՆ նախագահ Դոնալդ Թրամփը հանդիպում է ունեցել Ճապոնիայի առաջին կին վարչապետ Սանաե Տակաիչիի հետ։ Տոկիոյում կայացած հանդիպմանը Թրամփը բարձր է գնահատել նորընտիր վարչապետի գործունեությունը, ռազմական հզորության կուտակումն արագացնելու և առևտրի ու կարևորագույն օգտակար հանածոների մասին համաձայնագրեր ստորագրելու որոշումը։
Տակաիչին, որ Թրամփի գոլֆի ընկեր և գործընկեր՝ հանգուցյալ Ճապոնիայի վարչապետ Սինձո Աբեի մերձավոր դաշնակիցն է, հայտարարել է Թրամփի թեկնածությունը Խաղաղության Նոբելյան մրցանակի համար առաջադրելու մասին։
Reuters-ի փոխանցմամբ, սպասվում է, որ նա կառաջարկի նաև ԱՄՆ ներդրումների փաթեթ՝ այս տարի համաձայնեցված 550 մլրդ դոլարի գործարքի շրջանակներում, ներառյալ նավաշինություն և ամերիկյան սոյայի, բնական գազի ու պիկապների գնումների ավելացում։
«Սա շատ ամուր ձեռքսեղմում է»,- ասել է Թրամփը, երբ նրանք լուսանկարվել են Տոկիոյի կենտրոնում գտնվող Ակասակա պալատի բակում։
«Ինչքան որ ես գիտեմ Սինձոյից և մյուսներից՝ դուք կդառնաք մեծ վարչապետներից մեկը։ Նաև ուզում եմ շնորհավորել ձեզ՝ առաջին կին վարչապետ դառնալու կապակցությամբ։ Սա մեծ իրադարձություն է»,- ասել է Թրամփը Տակաիչիին։
Հանդիպմանը Տակաիչին Թրամփին նվիրել է Աբեի գոլֆի փաթերը, ճապոնական խոշոր մրցաշարերի հաղթող Հիդեկի Մացույամայի ստորագրությամբ գոլֆի պայուսակ և ոսկե տերևով գոլֆի գնդակ։
