Եվրոպան ա՞չք է փակելու Բաքվի քայլերի վրա, էթնիկ զտում արեցին Արցախում, ՀՀ-ից տարածքներ են զավթել։ ՀՀ Ազգային ժողովում ընթացող Արևելյան գործընկերության խորհրդարանական վեհաժողովի (Եվրանեսթ) 12-րդ լիագումար նստաշրջանի Քաղաքական, մարդու իրավունքների և ժողովրդավարության ու Տնտեսական ինտեգրման, իրավական մոտարկման ու ԵՄ քաղաքականությունների հետ համապատասխանեցման հարցերի հանձնաժողովների ընդհանուր նիստի ընթացքում ասաց ԱԺ «Հայաստան» խմբակցության պատգամավոր Արթուր Խաչատրյանը՝ դիմելով եվրոպացի օրենսդիրներին։
«Արդյո՞ք մենք հանդուրժելու ենք երկակի ստանդարտները, թե՞ պահանջենք, որպեսզի Ադրբեջանը երաշխավորի մարդկանց արժանապատիվ վերադարձը իրենց տներ։ Մի քանի տասնյակ հայեր հիմա Բաքվի բանտերում են, այս վեհաժողովը պետք է ձայն բարձրացնի՝ առանց նախապայմանների նրանց ազատ արձակումը»,- ասաց Խաչատրյանը։
