«Նախնական տվյալներով ունենք սպանություն. երեխայի հայրը խեղդամահ անելով սպանել է փոքրիկին»,-հայտարարել է ՆԳ նախարար Արփինե Սարգսյանը՝ անդրադառնածով Ծափաթաղ գյուղում անհետացած 3-ամյա Տիգրան Օվանեսովի դեպքին։
Նախարարի տեղեկացմամբ. «Շատ նախնական տվյալներով, երկու եղբայրները դուրս են եկել տանից, հետո հորն են հանդիպել։ Հայրը խեղդելու ճանապարհով սպանել է փոքրիկին»։
Նա նաև նշել է, որ «Երեխայի հայրը նշել է, որ ներընտանեկան որոշակի հարցադրման շրջանակներում է վրա հասել դեպքը։ Այս պահի դրությամբ այլ տվյալ ես հանրայնացնել չեմ կարող»։
Նախարարի խոսքով, նշանակվել են փորձաքննություններ, այդ թվում՝ առողջական վիճակի մասով հարցեր պարզելու համար. «Թեման կոմունիկացվել է տարածքային միասնական սոցծառայության գործընկերների հետ, որ ընտանիքում բնակվող մյուս երեխաների մասով որոշումներ կայացվեն»։
Սարգսյանը նշել է, որ սպանության վարկածը ևս առաջին իսկ օրվանից եղել է իրենց ուսումնասիրության շրջանակներում։
Հիշեցնենք՝ նոյեմբերի 2-ին՝ ժամը 15։00-ի սահմաններում, Ծափաթաղ բնակավայրի հարակից դաշտամիջյան հատվածում փրկարարները հայտնաբերել են հոկտեմբերի 27-ից որոնվող 3-ամյա Տիգրան Օվանեսովի դին։
