Եթե մենք այսօրվա մեր գործողությունների տրամաբանությունն ու հիմնավորումը փորձենք գտնել պատմության մեջ, նշանակում է` մենք չենք հավատում խաղաղությանը. հայտարարել է վարչապետ Նիկոլ Փաշինյանը «Օրբելի» կենտրոնի՝ «Կառուցելով խաղաղություն և բազմակողմանի համագործակցություն» ֆորումում։
Ըստ վարչապետի՝ պատմությունը սովորաբար խաղաղության մասին չի լինում, այն լինում է կոնֆլիկտների մասին, որովհետև խաղաղության մեջ հետաքրքիր բան չկա։
«Խաղաղությունը վիճաբանություններ և բանավեճեր չի հրահրում, խաղաղությունը հրահրում է ներդաշնակություն։ Ներդաշնակությունն էլ պատմաբանների համար ամենձանձրալի իրավիճակն է»,- ասել է վարչապետը։
Նա նաև հայտարարել է, որ քաղաքական առումով կոնֆլիկտը լուծված, ավարտված է, բայց սոցիալ-հոգեբանական առումով՝ ոչ։
«Ընդհանրապես, ներքին տեղահանվածների, փախստականների վերադարձի օրակարգը համարում եմ վտանգավոր, որովհետև դա նշանակում է վերադառնալ կոնֆլիկտի նախնական պարամետրերին։
Եթե մենք այսօրվա մեր գործողությունների տրամաբանությունն ու հիմնավորումը փորձենք գտնել պատմության մեջ, դա նշանակում է՝ մենք չենք հավատում խաղաղությանը»,- հավելել է նա։
