Հոկտեմբերի 27-ից նոյեմբերի 2-ը ՀՀ Շուկայի վերահսկողության տեսչական մարմնի ղեկավար Արմեն Կոտոլյանի գլխավորած պատվիրակությունը, ինչպես նաև ՀՀ Տեսչական մարմինների աշխատանքների համակարգման գրասենյակի ղեկավար Պետրոս Մարտիրոսյանը, Արաբական Միացյալ Էմիրությունների (ԱՄԷ) Ֆուջեյրա քաղաքի քաղաքապետարանի գլխավոր տնօրեն՝ Մուհամեդ Սայֆ Ալաֆհամի հրավերով գտնվում էին ԱՄԷ Ֆուջեյրա քաղաքում՝ մասնակցելու Ֆուջեյրայի միջազգային հանքարդյունաբերական 10-րդ համաժողովին, ինչպես նաև Ֆուջեյրայի քաղաքապետարանի ոչ պարենային ապրանքների վերահսկողություն իրականացնող վարչության աշխատակիցների հետ հանդիպում-քննարկմանը։
Միջոցառումները իրականացվեցին Բարձրագույն խորհրդի անդամ, Նորին Մեծություն Շեյխ Համադ բին Մոհամմեդ Ալ Շարկիի՝ Ֆուջեյրայի էմիրության կառավարիչի հովանու ներքո։
Ֆուջեյրայի քաղաքապետարանում քննարկվեցին այնպիսի թեմաներ, ինչպիսիք են արհեստական բանականության և օնլայն առևտրի վերահսկողության մարտահրավերները, ինչպես նաև դրանց վերահսկման մեխանիզմների մշակման կարևորությունը՝ շուկայում վերահսկողություն իրականացնող մարմինների համար։
Ձեռք է բերվել պայմանավորվածություն հետագա համագործակցության ամրապնդման ուղղությամբ, ինչպես նաև կարևորվեց համատեղ ջանքերն ուղղել 2024թ․ հոկտեմբերի 29-ին Ֆուջեյրայում տեսչական մարմնի ներկայացուցիչների հետ ձեռք բերված պայմանավորվածությունների զարգացմանը, որը նոր խթան կհաղորդի երկկողմ հարաբերություններին։
