Հակակոռուպցիոն դատարանում, դատավոր Գիվի Հովհաննիսյանի նախագահությամբ, ընթանում է ՀՀ երրորդ նախագահ Սերժ Սարգսյանի գործով դատական նիստը։ Նշենք, որ նիստի մասին նախապես հայտարարված չի եղել, միայն երեկ երեկոյան են տեղյակ պահել, որ այսօր կկայանա դատական նիստը։
Դատավորը հայտարարեց, որ երեկ ուշ երեկոյան հանրային մեղադրող Ծովակ Մնացականյանը միջնորդություն է ներկայացրել մեղադրյալի նկատմամբ որպես խափանման միջոց նաև բացակայելու արգելք կիրառելու մասին։
«Այդ իսկ պատճառով հրատապության կարգով այսօր դատական նիստ է նշանակվել՝ քննելու նշված միջնորդությունը»,- ասաց դատավորը։
Սերժ Սարգսյանի պաշտպաններից Ռուբեն Հակոբյանն ասաց, որ եթե քննարկվելու է խափանման միջոցի հետ կապված հարց, առաջարկեց անցկացնել դռնփակ։
«Նախկինում էլ ենք մեր դիրքորոշումը ներկայացրել. եթե խափանման միջոցը վերացնելու հիմնավորումները գտնում էինք, որ կապված էր նաև վարույթի մասնակցի մասնավոր կյանքին, հետևաբար նույն դիրքորոշումն ունենք՝ խնդրում ենք նիստն իրականացվի դռնփակ»,- ասաց փաստաբանը։
Դատավորը որոշեց նիստն անցկացնել դռնփակ։
Նշենք, որ Գիվի Հովհաննիսյանի վարույթում քննվող գործին (Գործի համար: ՀԿԴ/0154/01/25) միացվել է Սերժ Սարգսյանին վերաբերող մեկ այլ գործի (Գործի համար: ՀԿԴ/0249/01/25)՝ «դիզելի գործի» քննությունը։
Հիշեցնենք, որ «դիզելի գործով Վերաքննիչ հակակոռուպցիոն դատարանը բավարարել է Դատախազության բողոքը, բեկանել առաջին ատյանի ընդհանուր իրավասության դատարանի՝ Սերժ Սարգսյանի և մյուսների արդարացման վերաբերյալ դատական ակտն ու գործն ուղարկել նոր քննության:
Գործի համար: ՀԿԴ/0154/01/25
Մեղադրական եզրակացության համաձայն. «Սերժ Ազատի Սարգսյանը 2000 թվականից մինչև 2007 թվականը զբաղեցնելով ՀՀ պաշտպանության նախարարի, 2007 թվականի ապրիլի 4-ից մինչև 2008 թվականի փետրվարի 19-ը՝ ՀՀ վարչապետի, 2008 թվականի ապրիլի 9-ից մինչև 2018 թվականի ապրիլի 17-ը՝ ՀՀ նախագահի, իսկ 2018 թվականի ապրիլի 17-ից մինչև 2018 թվականի ապրիլի 23-ը՝ ՀՀ վարչապետի պաշտոնը, ինչպես նաև 2006 թվականից հանդիսանալով Հայաստանի Հանրապետության և Ռուսաստանի Դաշնության միջև տնտեսական համագործակցության՝ գույքային, առևտրատնտեսական, ֆինանսական հարցերի համակարգման համար 1997 թվականի հուլիսի 1-ին հիմնադրված հայ-ռուսական միջկառավարական հանձնաժողովի նախագահ, օրենքով նախատեսված արգելքին հակառակ 2006-2015 թվականների ընթացքում «ԼԼ բիմբո» ՍՊ ընկերության հիմնադիր Սեդրակ Քոչարյանի, նույն ընկերության տնօրեն Ալեքսան Որսականյանի և իր հետ մտերիմ հարաբերությունների մեջ գտնվող Միխաիլ Բաղդասարովի կողմից միջոցներ տրամադրելու և խոչընդոտները վերացնելու եղանակներով դրսևորված օժանդակությամբ մասնակցել է Միխաիլ Բաղդասարովին պատկանող, այդ թվում՝ «Միկա Լիմիթեդ» և «Աբիտ» առևտրային կազմակերպությունների կառավարմանը՝ արտոնություններ, առավելություններ տրամադրելով նշված կազմակերպություններին և հովանավորելով իրականացվող գործունեությունը, որը դրսևորվել է օտարերկրյա ներդրումներով խոշոր տնտեսական ծրագրերում ներգրավելով, բարձր ռիսկայնության պայմաններում շուրջ 14 միլիոն ԱՄՆ դոլար վարկի տրամադրմամբ, օտարերկրյա կազմակերպությունների կողմից գույքի ձեռքբերման գործընթացներում ներգրավելով և այլն:
Բացի այդ, Սերժ Սարգսյանը «ԼԼ բիմբո» ՍՊ ընկերության հիմնադիր Սեդրակ Քոչարյանի կողմից միջոցներ տրամադրելով և խոչընդոտներ վերացնելով դրսևորված օժանդակությամբ Միխաիլ Բաղդասարովի և նրա մասնակցությամբ առևտրային կազմակերպությունների օգտին իր լիազորությունների շրջանակում գործողություններ կատարելու, պաշտոնեական դիրքն օգտագործելով այդպիսի գործողությունների կատարմանը նպաստելու համար պահանջել և ստացել է առանձնապես խոշոր չափերով գույք՝ «Աբիտ» ՍՊ ընկերության 22,5 տոկոս բաժնեմասը, որը 2008 թվականի մարտի 23-ին ձևական գործարքով՝ 100.000 ՀՀ դրամով, վաճառվել է «ԼԼ բիմբո» ընկերությանը»։
Գործի համար: ՀԿԴ/0249/01/25
Մեղադրական եզրակացության համաձայն. «Սերժ Սարգսյանին մեղադրանք է առաջադրվել այն բանի համար, որ նա 2008թ․ ապրիլի 9-ից մինչև 2018թ․ ապրիլի 9-ը ընկած ժամանակահատվածում, զբաղեցնելով ՀՀ նախագահի պաշտոնը, հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, իր պաշտոնեական դիրքն օգտագործելով, 2013թ․ հունվարի 25-ից մինչև նույն թվականի փետրվարի 7-ն ընկած ժամանակահատվածում, կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489,160,310 ՀՀ դրամի հափշտակության կատարում»։
