Ռուսաստանը ներկայումս ԱՄՆ-ի հետ չի կիսվում Ուկրաինայի առաջնագծի քարտեզներով, չնայած՝ նախկինում դա արել է. ասել է ՌԴ նախագահի մամուլի քարտուղար Դմիտրի Պեսկովը։
«Մենք դրանցով հիմա չենք կիսվում։ Երբ շփումներ կային, իհարկե, քարտեզների վերաբերյալ պարզաբանումներ էին տրամադրվում», – ասել է նա։
Հոկտեմբերի վերջին ԱՄՆ է այցելել նախագահի արտասահմանյան երկրների հետ ներդրումների և տնտեսական համագործակցության հարցերով հատուկ ներկայացուցիչ և Ռուսաստանի ուղղակի ներդրումների հիմնադրամի ղեկավար Կիրիլ Դմիտրիևը։
Նա հայտնել էր, որ Մոսկվան, ի թիվս այլ բաների, ամերիկյան կողմի հետ տեղեկատվությամբ է կիսվում Ռուսաստանի տնտեսության իրական վիճակի և Ուկրաինայում տիրող իրավիճակի, ինչպես նաև՝ խաղաղության երկխոսության վերաբերյալ Ռուսաստանի դիրքորոշման մասին։
Մասնավորապես, Միացյալ Նահանգներին տեղեկատվություն է տրամադրվել Կուպյանսկի և Կրասնոարմեյսկի հատվածներում ավելի քան 10.000-անոց ուկրաինական զորքի շրջապատման և նոր «Բուրեվեստնիկ» հրթիռի մասին։
Միացյալ Նահանգները մարտական գոտիներում իրավիճակի վերաբերյալ տվյալներով քարտեզներ է ստացել ոչ միայն Ռուսաստանից, այլև՝ Ուկրաինայից։ Մասնավորապես, ուկրաինական պատվիրակությունը դրանք տարել է Վաշինգտոն՝ ԱՄՆ նախագահ Դոնալդ Թրամփի մոտ։
